“Con evitar un só contaxio, o traballo mereceu a pena”, asegura o seu promotor Martínez Lastra
A plataforma EscudoCovid.19 pon fin a súa actividade, que comezou a finais do pasado de marzo, cun balance “moi positivo”, asegura o seu promotor e director do Centro de Investigación en Tecnoloxías, Enerxía e Procesos Industriais da Universidade de Vigo, (Cintecx), José Luis Martínez Lastra.
“Nunca pensei que chegaríamos a unha produción de pantallas acumulada de máis de 236.000 escudos a nivel nacional, dos que 56.000 corresponden a Galicia”, asegura o docente e investigador, que puxo en marcha a iniciativa para loitar contra o avance da COVID-19, nun primeiro momento, valéndose da súa amizade coa empresa madrileña Trovican, onde se deseñou unha pantalla con suxeición por brida e que se podía facer troquelando o material.
Unha vez que o deseño se facilita en aberto para uso non comercial, moitas empresas do gremio sumáronse á iniciativa, que no caso de Galicia ponse en marcha a partir dunha conversa de Martínez Lastra cos investigadores de Cintecx Enrique Granada e Pedro Arias.
“Rapidamente, puxémonos a traballar coa subdirectora do centro, Itziar Goicoechea, co director do Vigo Tecnolóxico, Daniel Villanueva, e a vicerreitora de Transferencia, María Consuelo Pérez, a buscar soporte industrial, que finalmente atopamos en Asime”, explica o director de Cintecx, que para levar os seus plans á práctica tamén contou coa colaboración do docente José Antonio Pérez, que “foi a persoa que estivo a pé de fábrica organizando e colaborando na produción de Valver, empresa, que aínda sen estar asociada a Asime, foi o centro de produción en Galicia”.
Transcorridos preto de dous meses desde a súa posta en marcha, EscudoCovid.19 remata a súa actividade non só cun balance moi positivo, segundo o seu promotor, senón tamén coa satisfacción “de saber que o teu traballo na universidade axuda á sociedade, que é quen nos mantén grazas aos seus impostos. Galicia en xeral, e Vigo en particular, ten un tecido industrial moi receptivo ao que se lle formula desde a universidade e esta colaboración foi fantástica e quero agradecer a Enrique Mallón, xerente de Asime o seu traballo”, sinala Martínez Lastra, que considera que “con evitar un só contaxio, o traballo mereceu a pena”.
No mesmo sentido, Mallón asegura que “desde o primeiro momento desta crise, desde Asime entendemos que debiamos estar á altura das circunstancias e por iso volcámonos de cheo nesta iniciativa solidaria coa Universidade de Vigo. Nela púxose en valor a importancia da colaboración empresa-universidade, conseguindo repartir miles de pantallas coas que contribuímos a protexer ao persoal sanitario e asistencial que loita cada día contra o virus en primeira liña”.
A UVigo como eixo vertebrador da iniciativa en Galicia
Ademais de Galicia, Madrid, Cantabria, Cataluña, Valencia, Murcia, Andalucía, Euskadi e as dúas Castelas son as comunidades nas que radican as empresa que participaron nesta iniciativa, ben producindo, subministrando material ou ferramentas ou na parte de loxística.
“En Galicia, a diferenza doutras rexións, a plataforma articúlase arredor da UVigo e conta con Asime para poder organizar a industria local. Esta organización facilita, por unha banda, acceso vía universidade, a un coñecemento contrastado en cuestión de materiais, produción, etc, e grazas a Asime, ao músculo financeiro dos seus membros, e a un coñecemento global do mapa industrial galego”, detalla o director de Cintecx. Martínez Lastra destaca tamén que, sumado o coñecemento da Xunta á hora de repartir o material alí onde existían necesidades, ademais das instrucións por parte da área sanitaria de Vigo, “temos como resultado unha produción e distribución optimizada da demanda”.
En Galicia, na produción dos escudos participaron as empresas Adhex, Mepronor, Plascies, Plymouth, Troqueles Galicia e Valver, mentres que outras firmas sumaron a súa colaboración: Dativic, Lupeon, MCSyncro, Mepronor, Plascies, Plymouth, Cerradoras López Galicia, Chou Pesqueira, Coren, Distevi, Gadisa, Fabricaciones Parma, Instalaciones del Noroeste, Itera Técnica, Laser Galicia, Metaldeza, Onice Estudios y Proyectos, Resinas Castro, Royal Roos Ingeniería, Solmecor, Umiametal e Vigumat.
Desde Finlandia, onde reside e desenvolve o seu labor profesional, o director de Cintecx explica que non precisaron plataformas como Escudocovid.19 para facer fronte á pandemia “porque aquí a solidariedade está formalizada e ten nome: impostos. Grazas a un imposto directo que pagamos ao consumo de enerxía, mantemos uns almacéns secretos dotados de material para estes casos, inicialmente pensados para unha invasión eventual da URSS. A parte negativa é que agora xa se sabe a localización dos mesmos e teremos que construílos de novo”, relata Martínez Lastra, que apunta que o pequeno tamaño do país, permitiulles ir por detrás do resto de Europa, o que lles deu vantaxe á hora de poder reaccionar tendo e conta o que ocorría noutros lugares.
