Xabier Pérez Igrexas: “fronte a quen só pode ofrecer máis do mesmo, o BNG vai levar Vigo máis alá cun proxecto en positivo e coas persoas no centro”
A portavoz nacional destaca o traballo “valente e rigoroso” do candidato do Bloque, con propostas en positivo fronte á confrontación inútil dos que usan Vigo como un pim-pam-pum
A portavoz nacional, Ana Pontón, participou na presentación de Xabier Pérez Igrexas como candidato á Alcaldía de Vigo, do que salientou o seu traballo “valente e rigoroso” e sempre con propostas en positivo. “Así é como entende a política o BNG, mentres outros se perden nun enfrontamento inútil, nun pim-pam-pum con Vigo tan absurdo como estéril, que está facendo perder moitas oportunidades á primeira urbe de Galiza”, incidiu.
Pontón recalcou que, nun contexto de crise, non se pode seguir perdendo o tempo na confrontación, polo que defendeu que “Vigo merece moito máis que ser o campo de batalla dos egos políticos de ninguén” porque esta cidade “ten que ser o motor principal de Galiza, recuperar o papel de vangarda industrial e empresarial, volver ser o referente que sempre foi no sector naval, na automoción ou na pesca e tamén aquel referente cultural que colocou á cidade entre as máis creativas do Estado español e de Europa”.
Vigo precisa, subliñou, ter un proxecto de futuro que lle permita recuperar pulso no económico, no social e no cultural e “ese proxecto de futuro é o que representa o BNG, desde a seriedade e a solvencia, con propostas e alternativas en positivo, para dinamizar a industria viguesa, reforzar os servizos públicos na cidade ou impulsar vivenda a prezos razoables, sobre todo en aluguer, hoxe con prezos que moitas familias, e especialmente a xente moza, non poden pagar”.
A líder nacionalista tamén salientou a aposta decidida do Bloque para que Vigo lidere, desde a cooperación, a área metropolitana e xogue un papel fundamental no avance da Eurorrexión Galiza-Norte de Portugal. Neste sentido, defendeu a conexión ferroviaria por alta velocidade con Porto “fronte a quen mira para outro lado ante o desleixo que o Goberno central mostra con esta infraestrutura ou fronte a quen a usa como arma arreboladiza”.
“O futuro de Galiza non se entende sen un Vigo puxante, que avance”, remarcou, para concluír destacando o seu convencemento de que “Xabier como candidato á Alcaldía e todo o BNG imos dar o mellor para conseguilo”.
Na súa intervención, Pérez Igrexas chamou a “resetear a cidade” despois de anos de “inercia paralizante dun goberno municipal absolutamente incapaz”. “Fronte a quen só pode ofrecer máis do mesmo, dende o BNG imos levar Vigo máis alá”, afirmou. Igrexas propón un “proxecto de cidade en positivo coas persoas no centro” para levar Vigo “máis alá do parque temático, das luces, do dinoseto, dos titulares, das promesas incumpridas e das actuacións virais en platós televisivos; da frivolidade, da xordeira autoritaria e da falla de xestión”.
O candidato sintetizou as liñas estratéxicas que van definir a proposta do BNG para as eleccións municipais, que pasan por avanzar cara a unha “cidade de iguais”, con políticas feministas e facendo do Concello un “parapeto social contra a crise”, con máis servizos públicos e facilitando o acceso social á vivenda nunha cidade na que, apuntou, “temos 18.500 casas sen xente e moita xente sen casa”. Outros dos eixos fundamentais serán o da sustentabilidade ecolóxica, un urbanismo ao servizo dos intereses sociais e unha mobilidade para devolverlle a cidade ás persoas fronte aos coches.
Pérez Igrexas apostou por que Vigo volva ser “o pulmón industrial de Galiza” e converter a cidade na “capital galega da innovación, da tecnoloxía e das comunicacións”, poñendo en marcha tamén políticas que faciliten a creación de emprego e dean oportunidades á mocidade para que deixe de ser “expulsada á emigración”.
“Imos facer do diálogo unha obriga e da participación directa da veciñanza na toma de decisións un dereito”, prometeu. Recuperar o pulso da cidade como potencia deportiva e poñer fin ás políticas de desertización cultural son outras das liñas que definen o proxecto de cidade “rigoroso, innovador e aberto” co que o BNG aspira a unha verdadeira transformación da urbe.
Igrexas asegurou que o BNG enfronta os comicios con optimismo e ambición, “aspirando a todo, sen límites nin teitos, coa confianza de termos as ideas, a capacidade, a experiencia e un proxecto que vai lograr incorporar a moitos millares de viguesas e vigueses para facermos realidade, entre todas e todos, o Vigo que soñamos”. “Só un BNG determinante no Concello pode levar Vigo máis alá”, proclamou, nun acto que abriu a responsable local, Carmela González, quen destacou a elección por unanimidade do candidato.
