A fronte nacionalista suma na súa alternativa “en positivo” achegas e ideas recollidas durante máis de 50 encontros con diferentes colectivos e a través das redes sociais

O documento divídese en cinco coordenadas para levar ‘Vigo máis alá’: unha cidade máis habitábel e moito máis verde, igualitaria e socialmente xusta, que volva ser pulmón produtivo de Galiza, vangarda na creación cultural e motor de todo un País

Xabier P. Igrexas: “Son propostas que buscan dar resposta ás innumerábeis necesidades desatendidas estes últimos catro anos por un Goberno que deixou 436 millóns sen gastar, na certeza de que Vigo merece máis”

O Bloque Nacionalista Galego vén de presentar este mércores o seu programa aberto con 629 propostas concretas para trazar un novo rumbo na cidade de cara ás eleccións municipais do 28 de maio. A fronte nacionalista suma na súa alternativa “en positivo” achegas e ideas recollidas durante máis de 50 encontros con diferentes colectivos e no que participaron varios centos de persoas e dun proceso participativo en redes sociais.

«Elaboramos o noso programa a pé de rúa, barrio a barrio e parroquia a parroquia, tratando directamente co tecido asociativo, para ofrecer unha proposta política ambiciosa pero, sobre todo, solvente e rigorosa que coñece en detalle as necesidades reais da cidade”, explicou o candidato do BNG á Alcaldía de Vigo, Xabier P. Igrexas, que avanzou que o documento segue aberto até as eleccións para seguir incorporando ideas durante os encontros que van desenvolver as nacionalistas nos vindeiros días.

Igrexas asegurou que este programa é “unha folla de ruta” coa que o BNG busca definir “un novo horizonte” para Vigo que supere a actual “inercia paralizante”. Un documento que se divide en cinco coordenadas básicas para levar ‘Vigo máis alá’: avanzar cara unha cidade máis habitábel e moito máis verde, igualitaria e socialmente xusta, que volva ser pulmón industrial e produtivo de Galiza, que sexa de novo referencia como vangarda na creación cultural e que asuma o seu papel como maior cidade galega e motor de todo un País.

“Son propostas que buscan dar resposta ás innumerábeis necesidades desatendidas estes últimos catro anos por un Goberno que deixou 436 millóns de euros sen gastar dos orzamentos municipais”, defendeu o candidato do BNG, que chamou a trazar un novo rumbo para a cidade “na certeza de que Vigo, de que as viguesas e vigueses merecen máis que propaganda e anuncios que acaban en promesas incumpridas”.

Programa aberto

Igrexas anunciou que a fronte nacionalista irá debullando durante os vindeiros días as principais propostas de cada eixo programático, mais chamou a veciñanza a seguir trasladando as súas ideas para a cidade. “Queremos elaborar o programa do mesmo xeito que defendemos que se debe gobernar Vigo: escoitando e dialogando de maneira permanente”, reiterou o cabeza de lista, que lembrou que “as transformacións que fixeron avanzar a cidade foron sempre empurradas desde abaixo e resultado da suma de vontades”.

O candidato do BNG mostrouse convencido de que “sumando en positivo, entre todas e todos, imos facer posíbel que a cidade volva avanzar”. “Con firmeza nos nosos principios e nas nosas ideas pero con disposición a incorporar outros puntos de vista, sabendo que os retos e as necesidades que enfrontamos esixen de respostas dinámicas, lonxe das rixideces do actual autoritarismo”, remachou.

A fronte nacionalista impulsará a creación de Consellos Veciñais de Barrio e Parroquia, a posta en marcha de orzamentos participativos e un maior apoio ao movemento veciñal respectando a súa independencia e pluralidade

O Bloque Nacionalista Galego promoverá “máis participación e codecisión veciñal” co obxectivo de poñer fin ao abandono dos barrios e parroquias da cidade. Así llo trasladou o candidato do BNG á Alcaldía de Vigo, Xabier P. Igrexas, a representantes do movemento veciñal nun encontro realizado onte á tarde en Coia.

Igrexas afirmou que “un BNG determinante seremos a garantía de que deixe de haber vigueses e viguesas de segunda para o Concello, asegurando que se atenden as necesidades da veciñanza en todo o territorio da cidade”. O candidato nacionalista criticou con dureza a decisión do actual Goberno municipal de “concentrar o groso do investimento municipal en grandes actuacións no centro, mentres os barrios e as parroquias están completamente abandonadas”.

“É indefendible que mentres se van gastar 15 millóns de euros nun ascensor de StarTrek [en alusión ao HALO] haxa inda moitos camiños sen beirarrúas, moitas zonas da cidade case sen servizos municipais, ou que se tarde case 4 anos en reparar un muro no Freixeiro e que a inmensa maioría dos anuncios acaben en promesas incumpridas”, cuestionou, lembrando que neste mandato o Goberno municipal deixou sen executar 436 millóns de euros do orzamento do Concello. “Cantas necesidades dos barrios e parroquias se podían ter atendido mobilizando eses recursos?”, interpelou.

Máis participación e codecisión

Co obxectivo de “impedir que ningún Goberno poida volver someter ao abandono o conxunto da cidade”, Igrexas defendeu a necesidade dunha maior participación e codecisión veciñal. Neste sentido, trasladou as principais propostas da fronte nacionalista, entre as que salientou a necesidade dun novo Regulamento de Participación Cidadá, que “blinde o dereito da veciñanza a ser escoitada”.

A creación dos Consellos Veciñais de Barrios e Parroquias, como instrumento para a descentralización administrativa do Concello e como espazo para a participación directa do tecido asociativo e da veciñanza na toma de decisións, é outra das medidas que o BNG impulsará nos próximos 4 anos. “Queremos que sexan os propios barrios e parroquias quen decidan as actuacións do Concello nos seus ámbitos poñendo fin a política caprichosa do ‘aquí mando yo’ e a xordeira autoritaria destes anos”, explicou.

Estes Consellos terían como función, entre outros, a definición dos investimentos dentro dun modelo de orzamentos participativos que impida que haxa zonas da cidade onde hai “moitos, demasiados anos, que o Concello non inviste nada”.

Apoio ao movemento veciñal

Igrexas valorou a “enorme achega” que fai o movemento veciñal na cidade. “Sodes o Concello alí onde o Concello non chega ou non quere chegar”, resumiu. Emporiso, trasladoulles a vontade do BNG de brindar un maior apoio desde o Concello ao tecido asociativo veciñal, respectando a súa total independencia e pluralidade, fronte ao “brutal caciqueo que a golpe de extorsións e chantaxes políticas tentou amordazar a aquelas entidades que se atreven a reivindicar melloras para os seus barrios”.

“Se algo aprendín nos máis de 12 anos que participei activamente do asociacionismo veciñal foi a escoitar e, sobre todo, a escoitar a quen pensa diferente. Aprendín que a cidade faise desde abaixo, a pé de rúa, desde os barrios, entre todas e todos. Esas leccións son fundamentais para abrir o tempo novo que merece Vigo”, remachou o candidato nacionalista expresando o seu orgullo por ter sido parte do movemento veciñal.