A Vigo Film Office, a oficina do Concello dedicada á captación de rodaxes e á promoción de Vigo e a súa área, presentará en Valladolid hoxe martes e mañá mércores as vantaxes da cidade como escenario ante 70 localizadores e produtores procedentes de sete países

A III Edición do evento Shooting Locations Marketplace, que se celebra en Valladolid este martes e mañá mércores, contará coa Vigo Film Office, a oficina do Concello de Vigo dedicada á captación de rodaxes e promoción da cidade e da súa área. Vigo debutou o ano pasado neste encontro co obxectivo de atraer rodaxes nacionais e internacionais e foi moi ben recibida polos profesionais, que se sorprenderon pola gran variedade de localizacións e paisaxes que ofrece a cidade.

O alcalde destacou que a feira incrementase este ano a participación nacional e internacional de destinos, produtores, localizadores e empresas vinculadas á produción audiovisual. En total están participando 69 profesionais de sete países entre os que se atopan algúns dos principais estudos e plataformas como Netflix, Apple, Disney, Amazon, Hulu, HBO, NBC Universal, Marvel, Disney, Vancouver Media, Warner Bros ou Warner Brothers, perfís executivos que teñen capacidade de decisión na elección de destinos. “Vigo avanzando como plató de rodaxe, un novo escenario de lanzamento do turismo na cidade e de coñecemento internacional para a cidade”, sinalou Caballero.

O 65 por cento dos localizadores e produtores son estadounidenses e británicos, os dous mercados máis potentes da industria audiovisual occidental. Entre os localizadores cos que se reunirá Vigo atópanse algúns tan prestixiosos como a veterana Lori Balton, que este ano traballou en “A mansión encantada” e “A sirenita”. Estará tamén Miglet Crichton, que se atopa traballando en “The Sandman 2” para Netflix e quere que unha parte da rodaxe se realice en España; Amiee Clark, cuxo último proxecto foi “Oppenheimer”, de Chris Nolan; Jennifer Lyn, que traballou o pasado verán con Steven Soderburgh en “The Pendulum Project”.

A Vigo Film Office tamén se reunirá con localizadores españois como Carlos Dengra, especializado en rodaxes de anuncios publicitarios; Nacho Fidalgo, que localiza para Palma Pictures; Jaume Mirou, que traballou en “A Mesías” e para importantes marcas de publicidade ou Jaime Xordana, que está inmerso na nova película de Daniel Monzón.

Como complemento á súa participación neste evento, a Vigo Film Office organizou no último ano dous farmtrips (viaxe de familiarización), un con participantes internacionais e outro con nacionais, nos que amosou en persoa variados espazos da cidade e arredores. Os participantes admiraron a gran vantaxe de que en menos de tres cuartos de hora de distancia o destino permite acceder a espazos tan variados como cidades, castelos, praias, illas, estradas costeiras, pazos ou arquitectura industrial e contemporánea. Destacaron igualmente as facilidades que ofrece o Concello na xestión dos permisos de rodaxe; a gratuidade destes permisos así como dos cortes de rúas e cambios no mobiliario urbano que precisen. A dispoñibilidade de equipos profesionais altamente cualificados na cidade, así como empresas de servizos; a gran oferta hostaleira e axustados prezos, o clima temperado todo o ano e a exquisita gastronomía.

Balance de rodaxes en Vigo en 2023

No que vai deste ano 2023, a Vigo Film Office xestionou os permisos de rodaxe e asesorou a un total de 36 producións, entre as que destacan tres longametraxes, unha delas internacional, ademais de series (2), programas de TV (8), videoclips (1), documentais (3), curtametraxes (1), anuncio publicitarios (3) e unha quincena de prácticas de diversas escolas de audiovisual. Para 2024 xa hai previstas dúas rodaxes de gran interese: as longametraxes “San Simón” (dirixida por Miguel Ángel Delgado e producida por Miramemira, produtora de “O que arde”) e “Romaría”, a nova película de Carla Simón, que acaba de recibir o Premio Nacional de Cinematografía.