O candidato nacionalista á Alcaldía de Vigo defende un maior apoio aos coidados das persoas maiores, con políticas que combatan a soidade e dean oportunidades de lecer

O Bloque Nacionalista Galego propón ampliar os servizos e programas destinados ás persoas maiores para garantir unha vellez “digna e activa” en Vigo. Así o expuso onte o candidato do BNG á Alcaldía, Xabier P. Igrexas, durante un reparto informativo na feira de Bouzas no que chamou a brindar un maior apoio aos coidados, con políticas que combatan a soidade e dean oportunidades de lecer.

“Nunha cidade na que temos a máis de 14 mil persoas con máis de 65 anos que viven soas, o BNG cremos que o Concello de Vigo pode e debe facer moito máis que unha enquisa moi cara e da que inda non coñecemos os seus resultados”, defendeu Igrexas. “E ese é o noso compromiso, o de despregarmos medidas para reforzar os coidados da vellez”, engadiu.

Entre as propostas do Bloque destaca o incremento da oferta do Servizo de Axuda no Fogar (SAF), na actualidade moi minguado. “Son precisas moitas máis horas de atención, alargando a carteira de servizos para facilitar que as persoas maiores poidan seguir vivindo na súa casa cos apoios indispensábeis”, explicou o candidato nacionalista, que pediu tamén ampliar o número de persoas beneficiarias do Servizo de Teleasistencia e o Xantar na Casa. Nese sentido, apostou por iniciar unha progresiva remunicipalización da súa xestión “para que os coidados deixen de ser un negocio”.

Outras das iniciativas do BNG pasan por dar alternativas para un avellentamento activo, ofrecendo actividades para o lecer e a convivencia que conten coa participación das propias persoas maiores para o seu deseño. O candidato á Alcaldía considerou que nese obxectivo xogan un papel “chave” os centros culturais e veciñais, para os que demandou un maior apoio municipal. “O Concello ten que destinar moitos máis recursos para apoiar estas entidades, que son en grande medida a oportunidade para que as maiores socialicen”.

Na mesma liña, o BNG defende no seu programa de cara ás eleccións municipais do 28 de maio a necesidade de crear novos centros de día, residencias públicas e pisos tutelados e compartidos, en colaboración con outras administracións, diante da escasa oferta pública que existe hoxe na cidade.

“O BNG somos a forza á alza”

O candidato nacionalista valorou tamén as enquisas publicadas este domingo, destacando que estas confirman que o BNG é a “forza á alza” en Vigo. “Somos a forza que máis apoios está sumando neste último treito de campaña electoral, e estamos absolutamente convencidos e convencidas de que o 28 de maio imos dar a grande sorpresa”, asegurou Igrexas, que chamou a sumarse ao proxecto do Bloque ás “moitas millares de viguesas e vigueses que non se conforman con máis do mesmo, que saben e senten que Vigo merece máis, para construír xuntas e xuntos o Vigo que soñamos e merecemos”. 

O candidato nacionalista á Alcaldía de Vigo asegura nun acto público en Bembrive que un Bloque “determinante” no Concello a partir do 28 de maio será garantía dun “rotundo non” á PO-010 e ao proxecto de nova A-52

O Bloque Nacionalista Galego comprométese a retirar os proxectos de viais que ameazan con tronzar as parroquias rurais de Vigo. Así o afirmou este sábado nun acto público en Bembrive o candidato do BNG á Alcaldía de Vigo, Xabier P. Igrexas, que asegurou que un Bloque “determinante” no Concello a partir do 28 de maio será garantía dun “rotundo non” á PO-010 e ao proxecto de nova A-52.

“Son viais innecesarios aos que o BNG nos opuxemos desde o primeiro momento e que se pretenden impoñer a través dun PXOM elaborado na escuridade dos despachos, sen participación, sen diálogo e sen transparencia e que insiste nun modelo de cidade de gris cemento e asfalto”, denunciou Igrexas, que interviu xunto ao candidato nacionalista á Entidade Local Menor de Bembrive, Roberto Fernández Vila, e a candidata suplente, Beni Expósito. “Para o BNG o futuro da cidade só pode ser verde”, subliñou.

Igrexas defendeu ademais que Bembrive e o resto do rural son tamén cidade e non periferia nin extraradio. “A veciñanza das parroquias non son viguesas e vigueses de segunda”, salientou, de vez que reafirmou o compromiso do BNG con poñer fin ao “abandono que padecen desde hai demasiados anos”.

O candidato nacionalista chamou tamén a reforzar a cooperación e a colaboración entre o Concello de Vigo e a Entidade Local Menor de Bembrive, actualizando o convenio e asegurando os recursos necesarios para atender as necesidades da parroquia. “Alargando os servizos públicos, como as conexións de transporte urbano, e acabando coa estafa política de presentar aquí como humanizacións o que non pasa no mellor dos casos dun simple asfaltado”.

Sobre o cabeza de lista do BNG á alcaldía pedánea, Igrexas puxo en valor que Roberto Fernández Vila representa a esa moita veciñanza que sabe que Bembrive merece moito máis. “Unha persoa nova, capaz, con enerxía e ideas, comprometida de verdade coa parroquia”, afirmou, asegurando que o Bloque vai construír un Bembrive do que sentir orgullo.

Deixar atrás a corrupción na Entidade Local Menor de Bembrive

Pola súa banda, Fernández Vila chamou a abrir un tempo novo en Bembrive que deixe atrás o “triste récord de corrupción” que supoñen os 20 anos de inhabilitación e varios de prisión que suman os dous últimos alcaldes pedáneos do PSOE. “Levan moitos anos tratando a Entidade Local Menor como o seu negocio particular, cunha xestión nefasta envolvida en reiterados casos de corrupción”, dixo.

O candidato pedáneo apostou ademais por protexer e valorizar o monte e as augas de Bembrive. Propuxo, nese sentido, crear unha colaboración pioneira coa UVigo para promover iniciativas relacionadas coa investigación e a innovación no eido da agroecoloxía e os sistemas agroforestais. “Mudando así o actual abandono pola xeración de riqueza local”.

Defendeu tamén despregar un maior apoio e participación das diferentes asociacións, en particular no ámbito da cultura. Ademais, Fernández Vila reafirmou o compromiso do BNG de seguir esixindo dende a Entidade Local que a Xunta de Galiza repoña o servizo de pediatría no centro de saúde de Bembrive.