A idea é que poidan formular as solucións a estes desafíos a través dos seus TFG e TFM
18 empresas e 26 retos reais de innovación. Así son as cifras da II edición do programa de innovación aberta Colmea de Ideas, unha iniciativa posta en marcha en 2021 pola Área de Emprego e Emprendemento coa idea de recompilar os retos abertos que se poidan presentar desde as entidades e aos que o alumnado poida dar resposta a través dos seus traballos fin de estudo, ben sexa traballos fin de grao (TFG) ou traballos fin de mestrado.
“A idea do programa é aplicar un dos procedementos que se empregan hoxe en día para detectar e incorporar talento ás empresas, o que se chama innovación aberta”, explica a vicerreitora de Estudantado e Empregabilidade Natalia Caparrini, quen insistiu en que se trata de lanzar á contorna universitaria un desafío, unha necesidade ou un problema coa idea de que o estudantado expoña e desenvolva solucións e melloras a eses retos. Xunto a ela participaron na presentación do programa, realizada recentemente nun acto en liña, a directora da Área de Emprego e Emprendemento, Maruxa Álvarez, así como representantes de todas as empresas e institucións que participan, docentes –sobre todo coordinadores de traballos TFG e TFM- e estudantes interesados en coñecer os retos propostos.
Máis entidades participantes e máis retos a resolver
“A través deste programa compílanse todos estes desafíos formulados polas empresas para que as nosas universitarias e universitarios poidan axudar a resolvelos”, apuntou Caparrini, ao tempo que explicou que o programa se estrutura en tres fases. Unha primeira etapa, xa finalizada, foi a presentación dos retos por parte das entidades externas; a segunda, que se prolongará ao longo de todo o mes de outubro, é a publicación pública destes retos, e a terceira correspóndese coa presentación de candidaturas por parte do alumnado. A diferencia do curso pasado, no que se establecían un prazos concretos para a presentación de solicitudes por parte do alumnado, este curso eliminouse ese requisito. “Decatámonos de que as alumnas e alumnos están cada un nun proceso, nunha fase concreta, e por iso decidimos deixar aberto o prazo de solicitudes ao longo de todo curso”, explica a vicerreitora, quen apuntou que o que se fará será publicar tres resolucións distintas –en decembro, marzo e xuño-, co alumnado seleccionado para cada reto, de maneira que as persoas interesadas se poidan ir incorporando segundo as súas necesidades.
Tal e como se explicou durante a presentación, a segunda edición do programa trae consigo un maior número de entidades participantes e tamén un abano máis amplo de retos. “Hai 26 retos fronte aos 14 da edición anterior e 18 empresas, seis máis que en 2021”, recalcou a directora da Área de Emprego e Emprendemento, Maruxa Álvarez, facendo así fincapé na “ampla diversidade dos proxectos desta edición”.
Diversidade de desafíos
Os retos formulados polas empresas abarcan ámbitos moi diversos, desde cuestións relacionadas coa saúde e o coidado das persoas, ata retos ambientais e forestais, pasando por cuestións tecnolóxicas ou outras relacionadas cos ámbitos xurídicos e das humanidades. Algunhas empresas ou entidades formulan un solo reto, mentres que outras participan con distintos desafíos.
Na listaxe de entidades participantes aparecen nomes como o CTAG, o Centro Tecnolóxico da Automoción de Galicia, con cuestións relacionadas co deseño da automoción do futuro; a empresa Avícola de Galicia, que reta ao alumnado, entre outras cousas, a que lle axude a resolver cuestións como o aforro de auga neste tipo de empresas; a Fundación Roberto Rivas, que centra o seu desafío na busca de oportunidades na cadea de valor do sector forestal ou a firma Atendo Calidade SL, cuxo obxectivo é conseguir propostas que axuden a axilizar o funcionamento diario dun centro destinado a persoas maiores mediante o uso dun asistente virtual.
