O hospital vigués ofrece catro prazas formativas anuais para ensinar o manexo destes pacientes desde o rol da enfermaría
A Unidade de Enfermidade Inflamatoria Intestinal do servizo de Dixestivo do Álvaro Cunqueiro desenvolve un programa formativo dirixido ao persoal de enfermaría nacional interesado en especializarse no manexo das Enfermidades Inflamatorias Intestinal.
Así, a Unidade ofrece catro prazas anuais para esta formación, que este ano foron cubertas por enfermeiras doutras áreas de Galicia, de Asturias e Santander.
O programa, que se desenvolve en 3 días, inclúe formación teórica-práctica sobre a atención e funcionamento da consulta da enfermaría, ferramentas dixitais, xestión dos tratamentos no Hospital de Día, e incluso o papel investigador da enfermaría neste ámbito. Nesta formación participan activamente os dous profesionais de enfermaría da Unidade, Luciano Sanromán e Montserrat Figueira; ademais do apoio dos enfermeiros/as das Unidades de Estomaterapia e Aférese; asi como facultativos de dixestivo e doutros servizos hospitalarios .
Segundo os enfermeiros da Unidade “oprograma vai dirixido a enfermeiras/os de toda España que formen parte das Unidades de EII ou de nova incorporación ás mesmas, e que necesiten formarse nesta especialidade para ofrecer un trato e manexo excelente destes pacientes desde o seu rol de enfermaría”.
Así, a formación na consulta de Enfermaría especializada en EII permite dar resposta ás necesidades identificadas dos pacientes, e organizar a atención aos coidados requiridos para a abordaxe de pacientes de alta complexidade de acordo cos estándares de calidade recoñecidos polos organismos internacionais.
Certificación de calidade
Hai que recordar que esta Unidade conta coa certificación de Excelencia na Atención Integral a pacientes con EII, que concede o Grupo Español de Traballo en Enfermidade de Crohn e Colite Ulcerosa (GETECCU).
Trátase dun recoñecemento que sitúa ao hospital Álvaro Cunqueiro como centro de referencia e recoñece a calidade asistencial e investigadora desenvolta polos seus profesionais.
A EII inclúe fundamentalmente a Enfermidade de Crohn e a Colite Ulcerosa. O CHUVI ten rexistrados a 2.000 pacientes diagnosticados de EII que foron atendidos na Área Sanitaria de Vigo nalgún momento.
A Enfermidade Inflamatoria Intestinal
A Enfermidade de Crohn e a Colite Ulcerosa son enfermidades inflamatorias crónicas que afectan ao aparello dixestivo, alternando os períodos de actividade e de remisión. Ademais dos síntomas dixestivos, poden aparecer tamén manifestacións articulares, no pel e noutros órganos como os ollos e o fígado.
O síntoma principal en ambas enfermidades é a diarrea, que pode acompañarse de rectorraxia (sangue nas feces), principalmente na Colite Ulcerosa. Noutras ocasións, o síntoma é dor abdominal, anemia, perda de peso, febre e atraso do crecemento nos nenos.
A EII é unha enfermidade crónica de orixe descoñecida, que se é mal controlada pode evolucionar a un dano estrutural intestinal e complicacións. En ocasións precisa ingresos hospitalarios e cirurxías. O obxectivo do tratamento é lograr a remisión (ausencia de síntomas) o máis rápido posible e mantela no tempo, o que se consegue na maior parte dos casos, pero con necesidade de tratamento crónico.
A cronicidade da enfermidade, os controis periódicos, un tratamento farmacolóxico continuado e a posible necesidade de intervencións cirúrxicas teñen unha gran repercusión na vida familiar, laboral e social do paciente, e condicionan considerablemente a súa calidade de vida.
