Subliña que Xabier Pérez Igrexas ten liderado, equipo e proxecto e destacou que sempre que o Bloque foi determinante fixo avanzar Vigo

A portavoz nacional, Ana Pontón, participou no mitin de Vigo co candidato á Alcaldía Xabier Pérez Igrexas, e aproveitou para facer un dobre chamamento: á mobilización e a concentrar no BNG o voto de todas as persoas que queren outro modelo de cidade, o voto de cambio, de rebeldía e de ilusión.

“Vigo merece moito máis que a confrontación inútil, ridícula e partidista de PP e PSOE, que fai que perda oportunidades, que  empeora a vida da veciñanza e desaproveita o inmenso potencial que ten esta urbe”, declarou, e neste contexto, “o 28M é a oportunidade de dicir basta xa optando polo proxecto de futuro do BNG da man de Pérez Igrexas”.

Por riba co aval dos feitos, destacou, “porque sempre que o BNG foi determinante no concello fixemos avanzar Vigo e por iso, este 28M pido a todas as persoas que queren outro modelo de cidade que concentren o seu voto na candidatura do Bloque; e a todas as persoas rebeldes, inconformistas que queredes un Vigo sustentable, feminista, igualitario,  social, inclusivo, a toda a mocidade que quere un cidade que lle permita cumprir os seus soños, pídolles que enchan as urnas de votos ao BNG”.

A cidade precisa un proxecto que poña ás persoas no centro,  con mellores servizos públicos, máis sustentable, con máis oportunidades e máis xustiza social; para construír un Vigo cun tecido económico e industrial forte, “porque non é posible unha Galicia de futuro sen Vigo”, motor económico e industrial do País, referente no naval, na automoción, na pesca.

“O futuro de Galicia pasa polo futuro de Vigo, porque está cidade recupere o pulso perdido e no BNG temos proxecto político, liderado e equipo para conseguilo, e sei que imos ter un resultado espectacular nesta cidade”, augurou, porque hai outro Vigo e outra Galicia posibles, “en grande, con ambición, desde a confianza nas nosas propias forzas”.

Na recta final de campaña, Pontón fixo un chamamento a todas as persoas queren cambio para que se mobilicen nas urnas, e tamén trasladou unha apelación directa á mocidade, “para que sexa motor de cambio para poñer en marcha unha nova Galicia que pense na xente nova”. É o momento de votar BNG, proclamou Pontón, fronte a un PP “desnortado e esgotado” que non ten nada que ofrecerlle ao País, máis aló de escándalo e corrupción.

“O 28M tamén vai de rexeneración democrática, de expresar nas urnas a indignación ante os que pensan que poden utilizar as institucións como se fosen súas; vai de expresar a rebeldía e o inconformismo e de reivindicar outra maneira de gobernar, como a do modelo municipal do BNG. Un modelo de éxito que pon en marcha concellos con calidade de vida, con orgullo, con futuro e profundamente democráticos, e este modelo é o que queremos estender por toda Galicia este 28M”, concluíu.

Pola súa parte, o candidato á alcaldía de Vigo, Xabier P. Igrexas, chamou a “facer posible o que é necesario, empurrando cun BNG determinante as transformacións que necesita a maior cidade galega, deixando atrás esta etapa gris e acartonada que reduciu a política municipal a moreas de promesas incumpridas”.

Vigo merece máis

Igrexas, contrapuxo o proxecto aberto e en positivo do BNG para “levar Vigo máis alá” fronte ao do “candidato meme e da candidata dos selfies que só poden ofrecer máis do mesmo”.  “Merecemos avanzar cara a un Vigo máis habitable e verde, igualitario e socialmente xusto, que volva ser o pulmón industrial e produtivo de Galicia, que se referencie como vangarda cultural e que exerza o papel que nos corresponde como maior cidade galega: o de sermos motor de todo un País”, proclamou.

Na recta final para  que se abran as urnas e fronte a quen pretende desmobilizar dicindo que nada se pode facer, que o resultado está escrito, “o BNG dicimos que o voso voto si que vale, que non podedes permitir que decidan por vós”, afirmou Igrexas, apelando á mobilización este domingo.

“Para quen lle vale o que hai este domingo pasará sen máis. Pero as que vedes o que nós vemos, as que sentides coma nós que Vigo merece máis, moito máis, este 28 de maio podedes facer historia, abrindo un tempo novo na nosa cidade, dándolles unha sorpresa que non esquecerán xamais. Enchendo as urnas de votos polo futuro, por Vigo, por Galicia. De votos ao Bloque Nacionalista Galego!”, remachou Igrexas.

Representantes do ámbito sindical, cultural, veciñal, deportivo ou do activismo social adhiren á “alternativa aberta e en positivo” da fronte nacionalista cara ás eleccións municipais deste 28M

O candidato á Alcaldía, Xabier P. Igrexas, chamou a todas as viguesas e vigueses que non se conforman con máis do mesmo a “confluír” no BNG para lograr unha forza determinante no Pleno

O Bloque Nacionalista Galego presentou esta mañá un manifesto no que 51 referentes sociais da cidade chaman a apoiar a candidatura encabezada por Xabier P. Igrexas co obxectivo de “abrir un tempo novo” en Vigo.

Na relación de apoios salienta a presenza da escritora, María Reimóndez; o ex reitor da Universidade de Vigo, Salustiano Mato; a avogada e activista social, Esther Lora; o sindicalista, Alberto Gonçalves; o ex futbolista profesional, Jonathan Pereira; a profesora universitaria, Helena Migúelez; o dramaturgo, Afonso Becerra; a filósofa e escritora, Carme Adán; o xestor cultural e director teatral, Roberto Pascual; a cantautora, Su Garrido Pombo; así como catro ex presidentes da Federación Veciñal (Amador Fernández, Xosé Lois G. Pais, Xosé Sánchez e Fernando Seixo).

Igrexas valorou este “apoio amplo e plural, por parte de persoas de diferentes ámbitos, orixes e perspectivas” que encadrou na “imparábel onda de simpatía cara ao BNG na cidade de Vigo”. Remarcou tamén que a proposta política da fronte nacionalista é de “portas abertas e cunha vocación firme de sumar”.

“Confluír” no BNG

O candidato á Alcaldía agradeceu expresamente “a xenerosidade de persoas que provindo doutros espazos e organizacións políticas hoxe acreditan na importancia de que todas as viguesas e vigueses que non se conforman con máis do mesmo conflúan na alternativa aberta e en positivo do BNG”. Desta maneira, tivo palabras expresas para o ex concelleiro de Marea de Vigo durante o mandato 2015-2019, Xosé Lois Jácome, e tamén para a ex secretaria xeral de Podemos en Galiza, Carmen Santos, que se sumaron ao manifesto.

“Temos que garantir que ningunha viguesa nin ningún vigués que quere que as cousas muden na cidade poida ficar sen representación. E o BNG tendémoslle a man para darlle voz e voto no Pleno a toda a veciñanza que sabe e sente que Vigo merece máis e lograrmos unha forza determinante para deixar atrás a inercia paralizante dos últimos anos”, explicou.

Fechando as 51 sinaturas do manifesto do apoio está Carmiña Fernández Santos, unha referente histórica do movemento veciñal de Vigo e presidenta fundadora da AV Val do Fragoso, entidade que Igrexas reivindicou como a súa primeira militancia. “Carmiña foi e é unha grande referente persoal para min. Un exemplo de compromiso xeneroso en favor do ben común. Con ela aprendín que a cidade faise desde os barrios e as parroquias e da importancia de escoitar, sobre todo, a quen pensa diferente”.