O presidente da Deputación, acompañado polo deputado Jorge Cubela, salienta a suba dun 40 % do orzamento en vinte meses e a oportunidade de programar ata dous concertos por concello dun programa que aposta pola música e o sector musical galego
“Cando falamos de municipalismo e achegar os mellores servizos á veciñanza tamén nos referimos á cultura. Para nós a cultura é clave, igual que achegala a toda a veciñanza, viva onde viva”, afirma o presidente López
O presidente da Deputación de Pontevedra, Luis López, remarca a aposta do goberno provincial pola descentralización da cultura e a programación de actos culturais de calidade para achegar os mellores servizos á veciñanza sen importar o lugar no que viva. Un principio no que se sustenta a segunda edición do +Música, un programa presentado polo mandatario provincial este mércores no salón de plenos do Pazo provincial diante de rexedores da provincia e integrantes da industria musical galega que permitirá a realización este ano de 78 actuacións de músicos galegos nos 59 concellos de menos de 50.000 habitantes da provincia. “Cando falamos de municipalismo e achegar os mellores servizos á veciñanza sempre se nos vai á cabeza aos grandes proxectos construtivos como estradas máis modernas, un novo pavillón ou rúas humanizadas. Pero proporcionar grandes servizos á poboación tamén vai na cultura. Para nós a cultura é clave, igual que achegala a toda a veciñanza, viva onde viva”, afirmou o presidente Luis López nun acto no que tamén participou o deputado de Cultura, Jorge Cubela.
A segunda edición deste programa promovido pola Deputación que levará a mellor música en galego producida por profesionais de Galicia chega cargada de novidades. A principal está na dotación económica do programa, que medra en 100.000 euros con respecto á primeira edición para situarse nos 700.000 euros. “Subimos a achega en case un 40 % en menos de vinte meses”, puntualizou o presidente, lembrando que a primeira do +Música xa incrementara en 100.000 euros o programa musical anterior. Por primeira vez este ano, os concellos teñen a oportunidade de solicitar ata dúas actuacións, cando o ano pasado só podían programar unha, sempre que o caché dos artistas non superen o máximo de 15.000€. Ademais, o número total de actuacións tamén medra ata situarse en 78 concertos. A vindeira semana a Deputación comunicará aos concellos beneficiarios as actuacións concedidas, nas que se respectará as preferencias do grupo e data elixida polos gobernos locais. “Esta segunda edición do programa +Música chega cargado de novidades como consecuencia da máxima deste goberno, que é a de escoitar para entender e logo atender”, sinalou López abrindo a man a seguir incorporando as achegas do sector e dos concellos para seguir mellorando este programa para as vindeiras edicións.
O acto de presentación comezou coa actuación do dúo Antonio Barros e iAlma, un dos 224 grupos que forman parte do catálogo musical do +Música. Acto seguido, tomou a palabra Jorge Cubela para dar a benvida a todos os asistentes. “Cremos na profesionalización da cultura e da música, as institucións deben apostar para que a cultura sexa un instrumento vertebrador do territorio”, declarou o responsable da área de cultura do goberno provincial. A continuación, a presidenta da Asociación Galega de Empresas Musicais, Patricia Hermida, fixo fincapé na importancia do +Música para “posicionar á provincia como un destino cultural de referencia”. Unha reflexión compartida pola alcaldesa de Salvaterra do Miño, Marta Valcárcel, quen remarca a utilidade desta iniciativa da Deputación para facilitar “o dereito das veciñas e veciños para acceder a unha cultura de calidade vivan onde vivan”. Unha presentación que pechou o presidente Luis López cun discurso no que tamén puxo en valor o traballo do sector e o compromiso da Deputación para fomentar a música galega e en galego.
Actos culturais en todos os concellos
A descentralización da cultura como ferramenta para mellorar a calidade de vida da veciñanza de toda a provincia non está cinguida unicamente á posta en marcha desta segunda edición do +Música. “Queremos programar eventos da maior calidade fóra do ámbito de influencia das grandes cidades. Así o facemos cando por primeira vez na historia levamos a gala dos Premios Mestre Mateo a Lalín, creamos o primeiro circuíto de danza e teatro: o +Escénicas ou recuperamos despois de quince anos de ausencia a Bienal de Arte de Pontevedra, que non se limitará só á cidade de Pontevedra senón que se espallará por toda a provincia”, argumentou o presidente da Deputación. Un compromiso que vai en liña coa vocación municipalista do executivo de Luis López, quen agradeceu a presenza de rexedores, concelleiros ou técnicos de concellos de toda a provincia a asistencia ao Pazo provincial, nunha convocatoria que xa é habitual para anunciar a aprobación de proxectos de cooperación cos concellos. Así ocorreu a comezos de mandato para presentar o primeiro Plan +Provincia e o Plan Extraordinario de Infraestruturas Deportivas, para facer balance do primeiro ano do goberno de Luis López, no que se mobilizaron máis de 90 millóns de euros en 440 actuacións en todos os concellos, para presentar o plan de investimentos deste 2025, no que o +Provincia, o segundo PEID e o novidoso Plan Extra achegarán máis de 96 millóns de euros aos concellos ou, hai só unha semana, para presentar unha acción relacionada co reto demográfico como é o +Reto Dixital. Un compromiso colaborador cos concellos que tamén é aplicable ao sector musical, ao que o presidente provincial quixo “agradecer o seu traballo”.
