Abarcan temas como contaminación de augas, xestión de residuos agrícolas ou prevención de incendios

Presentáronse seis propostas e concedéronse catro. Nunca antes a Universidade de Vigo acadara unha taxa de éxito tan elevada nas diferentes convocatorias do Programa Interreg Sudoe, financiado  a través do Fondo Europeo de Desenvolvemento Rexional, Feder, e dedicado á cooperación transnacional. A UVigo coordina dous destes proxectos, financiados con 3,21 millóns de euros, e participa noutros dous cuxo financiamento roza os 5 millóns. Son en total máis de 8 millóns de euros dos que preto de 700.000 lle corresponden de xeito directo á institución académica viguesa.

Os proxectos aprobados son froito de consorcios compostos por socios públicos e/ou privados procedentes de rexións de diferentes países do sudoeste europeo, incluíndo España, Portugal, Francia, Xibraltar e Andorra. Presentáronse a este programa un total 144 propostas, das que finalmente se concederon 34, en catro das cales participa a Universidade de Vigo: por unha banda, Aquapred, Sistema de control e prevención de contaminantes en augas mineromedicinais mediante Intelixencia Artificial, e NewPower, Valorización integral de residuos agroforestais: novas biorrefinerías multiproduto escalables, coordinados ambos pola Universidade de Vigo, e, pola outra, Alert-PFAS, Estratexia transnacional para detectar e previr a contaminación por PFAS, e Use4Forest, Estratexia para a prevención de incendios no Sudoe mediante a mellora dos espazos forestais.

“Está claro que a UVigo xa ten un nivel de excelencia moi aceptable e o noso persoal investigador é quen de acadar este financiamento europeo”, explica  a vicerreitora de Investigación, Transferencia e Innovación Belén Rubio, quen se amosou “enormemente satisfeita”. A maiores fai tamén referencia ao traballo do persoal técnico e administrativo da Oficina de Proxectos Internacionais, OPI, “que coa súa dirección e axuda aos investigadores e investigadoras fomentan o éxito nestas convocatorias”. A modo de exemplo, a vicerreitora indica que “no que vai de ano presentáronse xa un total de 87 propostas de proxectos europeos nas que participa a Universidade de Vigo, 53 no programa Horizon Europe, que é un dos máis esixentes”. 

Aquapred, control de contaminantes mediante IA

Financiado con 1,87 millóns de euros e dirixido desde a UVigo polo profesor José Luis Legido, Aquapred é un consorcio formado por 15 entidades españolas, portuguesas e francesas que inclúen universidades como a Universidade da Coruña ou as universidades de Bordeaux e Pau; o Instituto Politécnico de Bragança, o centro de valorización AquaValor; institucións como a Axencia Turismo de Galicia, comunidades municipais e intermunicipais do norte de Portugal, e numerosas entidades do sector termal como os balnearios de Augas Santas e O Raposo, a cadea Caldaria, e o clúster termal francés Aqui O Thermes.  

Aquapred, segundo explicaron os seus responsables na presentación oficial  no Balneario Termal de Laias hai unhas semanas, é un proxecto multiterritorial e multidisciplinario enfocado á monitorización e control da auga termal/mineromedicinal dos balnearios e á predición de contaminantes, baseándose na dixitalización dos datos en tempo real dos parámetros fundamentais da auga mineromedicinal e a análise continua de ditos datos por un sistema de Intelixencia Artificial. Este sistema, tal e como detallaron na presentación, permitirá realizar “un control preventivo automático sobre os elementos de tratamento da auga que non afecte ás súas propiedades medicinais e desenvolver un modelo de deep learning que permita predicir a posibilidade de aparición de contaminantes en ditas augas (como a lexionela ou a e. coli)”.

NewPower, valorización integral dos residuos agroforestais

No caso de NewPower, Valorización integral de residuos agroforestais: novas biorrefinerías multiproduto escalables, dirixido polo catedrático da Facultade de Ciencias Gil Garrote e financiado con 1,34 millóns de euros, abordará problemáticas relacionadas coa alta xeración de residuos agrícolas e forestais que contribúen a causar incendios. Das 20 entidades que forman o consorcio, 11 reciben financiamento e 9 participan como asociadas. Os socios inclúen centros de I+D de Bragança, Braga, Toulouse, Povoa de Varzim, Abrantes ou Viseu; e empresas e cooperativas forestais con actividade no sur de Francia, norte de Portugal e noroeste español. 

O obxectivo é contribuír á xestión sostible de residuos agrícolas e forestais desenvolvendo procesos de conversión para a produción de enerxías renovables e novos produtos de alto valor engadido. Os produtos biofuncionais poderán ser utilizados nas industrias alimentaria, farmacéutica, biotecnolóxica e na agricultura ecolóxica. 

Alert-Pfas, reducir a contaminación das escumas retardantes utilizadas contra os incendios

Coordinado pola Universidade Nova de Lisboa e financiado con 1,9 millóns de euros, Alert-Pfas, Estratexia transnacional para detectar e previr a contaminación por PFAS, vai dirixido a deseñar e implementar unha estratexia transnacional para detectar e previr a contaminación por PFAS, substancias perfluoroalquiladas y polifluoroalquiladas contidas nas escumas retardantes utilizadas contra os incendios, nos espazos naturais Sudoe, así como a mitigar os seus efectos na biodiversidade dos ecosistemas e o cambio climático.

Con socios de España, Portugal e Francia, na UVigo coordina o proxecto o catedrático do CINBIO Manuel Martínez.

Use4Forest busca mellorar a capacidade de resposta fronte aos incendios forestais

O proxecto que conta con maior financiamento, case 3 millóns de euros, é Use4Forest, Estratexia para a prevención de incendios no Sudoe mediante a mellora dos espazos forestais, coordinado pola Dirección Xeral de Defensa do Monte (Xunta de Galicia), e que conta con socios, ademais, de España, Portugal e Francia. Coordinado na UVigo polo director da Escola de Enxeñaría Forestal, Juan Picos, o obxectivo deste proxecto é propoñer unha estratexia para a prevención de incendios no Sudoe mediante a mellora dos espazos forestais baseada en tres fases: coñecemento exhaustivo dos condicionantes do problema; desenvolvemento, proba e demostración nos territorios participantes de ferramentas innovadoras para a prevención, xestión e anticipación dos incendios forestais; e a súa transferencia e capitalización a escala Sudoe.

Organizado polo Departamento de Ecoloxía e Bioloxía Animal da UVigo

A cita arrancou onte domingo e prolongarase ata o venres

Máis de 300 especialistas no estudo das augas doces participan esta semana en Vigo na 22ª edición  do Congreso da Asociación Ibérica de Limnoloxía, unha cita que por primeira vez se celebra en Galicia e que trae á cidade a un destacado número de persoas interesadas no avance do coñecemento científico dos ecosistemas acuáticos continentais (ríos, lagoas, lagos…) e estudosos de todas aquelas cuestións que teñen que ver co avance desta materia, incluíndo a ecoloxía e a bioloxía dos organismos vinculados a estas augas tales como peixes, bacterias, insectos….

Organizado polo Departamento de Ecoloxía e Bioloxía Animal da Universidade de Vigo, o encontro inaugurouse este domingo coa participación da vicerreitora de Investigación e Transferencia, Belén Rubio; a presidenta do comité organizador, Josefina Garrido, e a presidenta da Asociación Ibérica de Limnoloxía, Núria Bonada.

Analizando os efectos do cambio global nos ecosistemas acuáticos

Titulado Ecosistemas acuáticos ameazados: avanzar no noso coñecemento para mitigar os efectos do cambio global, promover a xestión adaptativa e involucrar aos cidadáns, o encontro reúne a profesionais da limnoloxía de Portugal, España e outras rexións/nacionalidades para compartir e intercambiar coñecementos e experiencias. Ao mesmo tempo participan tamén representantes da industria e numerosas persoas interesadas na investigación ecolóxica acuática e na construción dun futuro medioambientalmente sostible.

De carácter bienal, o congreso prolongarase ata o venres na sede de Afundación e inclúe sesións plenarias nas que se tratarán temas transversais e de importancia para o conxunto da sociedade, desde o estudo do ADN, os microplásticos, as interaccións solo-auga… pero tamén outro tipo de xuntanzas como sesións técnicas especiais con persoas do ministerio e outros organismos, obradoiros, etc.

Cóntase, ademais, cunha importante presenza de investigadoras e investigadores noveis, tanto estudantes de doutoramento como posdoutoramento, así como de destacados investigadores e investigadoras sénior.

Entrega de premios ás mellores teses e mellor traxectoria profesional

Por outra banda o programa inclúe tamén a entrega de premios, tanto ás mellores teses de doutoramento de 2022 e 2023, como un galardón á mellor traxectoria  profesional que, por primeira vez, recaerá nunha muller científica, a doutora María Rosario Vidal Abarca, catedrática de Ecoloxía da Universidad de Murcia, especialista en ecoloxía de augas continentais. Será o vindeiro xoves pola tarde.

A xornada do venres queda reservada para unha viaxe ás illas Cíes.

Procedentes de Alemaña, China, Francia, Italia e Estados Unidos

Esta mañá inaugurouse no Parador de Baiona o 12º ACM Workshop on Information Hiding and Multimedia Security, IH&MMSec’24, un evento de referencia internacional no ámbito da seguridade multimedia e da ocultación da información, organizado polo Centro de Investigación en Tecnoloxías de Telecomunicación da Universidade de Vigo, atlanTTic, co apoio da ACM (Association of Computing Machinery). Desde hoxe e ata o vindeiro mércores no IH&MMSec’24 presentaranse os últimos avances que se están a realizar nestes ámbitos en institucións académicas, industriais e gobernamentais de todo o mundo, tanto desde o punto de vista teórico como de novidosas aplicacións industriais e comerciais.

Na inauguración oficial celebrada esta mañá participaron Jesús Vázquez Almuiña, alcalde de Baiona; Martín López Nores, vicerreitor de Profesorado e Ordenación Académica da UVigo; Martín Llamas Nistal, director de atlanTTic, e o catedrático e investigador da UVigo Fernando Pérez, presidente do comité organizador de IH&MMSec e líder do Grupo de Investigación en Procesado de Sinal en Comunicacións (GPSC) de atlanTTic. Pérez-González amosou na súa intervención o seu agradecemento ás  máis de 70 persoas asistentes procedentes de Alemaña, China, Francia, Italia ou EEUU,  e aos organizadores do evento, mentres que López Nores destacou as cifras de estudantado e internacionalización da UVigo. Pola súa banda, o director de atlanTTic,  resaltou o labor do centro e da Universidade de Vigo no ámbito da ciberseguridade, “unha das áreas estratéxicas do centro”, dixo. Mentres, o alcalde de Baiona, agradeceu ás e aos participantes a súa presenza en Baiona e máis concretamente no parador, “un lugar que adoita acoller grandes citas a nivel internacional”, asegurou Vázquez Almuiña.  

IH&MMSec’24, que conta co apoio da ACM (Association of Computing Machinery) e a colaboración de Gradiant, o Concello de Baiona e os proxectos Uncover, Trumpet e Truffles, desenvolverá un amplo programa que inclúe presentacións de artigos de investigación, mesas redondas e sesións especiais. Nas máis de 30 ponencias de investigadores e investigadoras internacionais, seleccionadas tras un esixente proceso de revisión por pares, abordaranse diferentes temáticas relacionadas coa seguridade da información e ocultación de información, como esteganografía, esteganálise, marcas de auga dixitais e anonimidade.  O programa tamén cubrirá diversos temas de seguridade multimedia, como a autenticación multimedia, a forensía multimedia, a biometría e a privacidade. Ademais, haberá catro sesións especiais sobre detectores confiables, stego-malware, detección de deepfakes de audio e privacidade e seguridade na  aprendizaxe federada. 

Tres días de relatorios, mesas redondas e sesións especiais 

As sesións da primeira xornada céntranse na esteganografía e esteganálise, stego-malware e a análise forense. O congreso ten programadas tres conferencias invitadas (keynote talks) a cargo de Gwenaël Doërr, de Synamedia (Francia), que se centrará na utilización de ferramentas dixitais para combater a piratería de vídeo; Christian Riess, da Universidad Friedrich-Alexander Erlangen-Nürnberg (Alemaña), afondará na tradución de avances teóricos na forensía de imaxes en aplicacións prácticas; e Jonathan W. Hak, da Universidad de Leiden (Holanda), discutirá as aplicacións da forensía multimedia en investigacións criminais.

O mércores pola tarde, como antesala ao peche do evento, celebrase a charla plenaria de Jonathan W. Hak, impulsada polo proxecto europeo Uncover, e a mesa redonda Navegando a Frontera da IA: Desafíos na Forensía Multimedia e a Esteganálise, sobre o uso da Intelixencia Artificial na análise forense de datos multimedia e en esteganografía, na que participarán Matthias Kirchner (Kitware Inc., EE.UU.), Ralf Zimmermann (ZITiS, Alemaña), Jonathan W. Hak (Leiden University, Holanda), e Mauro Barni (University of Siena, Italia) e Patrick Bas (CRIStAL, CNRS), que representarán ao ámbito empresarial, gobernamental, legal e académico, respectivamente, e estará moderada por Luis Pérez Freire de Gradiant.