A cidade olívica acollerá a celebración da primeira edición deste festival no Peirao de Transatlánticos este venres 29 e o sábado 30 de agosto

No cartel danse cita artistas como Mikel Izal, Dani Fernández, Beret, Leire Martínez, Sexy Zebras, La Habitación Roja e Dorian, entre moitos outros

As entradas para a primeira xornada do festival están xa esgotadas

Os Concertos do Xacobeo da Xunta de Galicia celebran un novo fito esta fin de semana en Vigo: o novo Festival Galicia Fest no Peirao de Transatlánticos da cidade olívica, que terá lugar o venres 29 e o sábado 30 de agosto. O director de Turismo de Galicia, Xosé Merelles, e a delegada da Xunta en Vigo, Ana Ortiz, visitaron esta mañá o recinto para supervisar os preparativos desta cita que xa ten practicamente esgotadas todas as entradas.

Sobre a celebración deste novo fito para a música en vivo en Galicia, o director de Turismo de Galicia, Xosé Merelles, salientou que “co apoio dos Concertos do Xacobeo, Vigo suma un novo e singular evento ao seu calendario estival, o Galicia Fest, que situará á cidade olívica no mapa estatal das citas estivais de referencia coa música en vivo, como una aposta pola calidade musical e o atractivo turístico en espazos tan singulares como o Peirao de Transatlánticos, que exploramos para a celebración de grandes eventos musicais de cara ao futuro”.

Merelles apuntou tamén, que “Galicia Fest non só busca ofrecer concertos, senón crear un espazo de encontro, gozo e descubrimento no corazón de Vigo, cun cartel atractivo para as audiencias máis actuais”. O director de Turismo de Galicia fixo fincapé en que “a cita será un novo motor socio-económico da contorna urbana, xerando gasto e riqueza cultural e converténdose nun activo da cidade para atraer a públicos curiosos de diferentes puntos de España”.

Pola súa banda, a delegada territorial da Xunta de Galicia en Vigo, Ana Ortiz, apuntou que “o Goberno galego ten un absoluto compromiso coa oferta musical e cultural da nosa cidade e este festival é outra proba que se suma a eventos como o concerto de Anastacia ou o Festival Musicav de jazz”. Ortiz tamén lembrou “outro moitos exemplos” como a actuación de Ivan Ferreiro ou o One Dance Festival celebrado no Ifevi e o evento Vigo Porté no Auditorio Mar de Vigo.

Galicia Fest é un novo festival de indie-pop que chega con ganas de marcar un antes e un despois no calendario musical de Galicia e do norte de España, como unha cita fundamental para os amantes da música en directo. Este evento combina unha localización privilexiada, un cartel de primeiro nivel con 15 agardados directos e unha ambiciosa proposta: ofrecer unha experiencia moderna, cultural e emocional, aliñada coas tendencias dun público novo e adulto que busca gozar da música nun entorno urbano, fresco e cheo de enerxía.

No marco dos Concertos do Xacobeo da Xunta de Galicia, o cartel do Galicia Fest 2025 reúne artistas de renome cunha traxectoria consolidada en festivais e xiras por todo o país, como Mikel Izal, Dani Fernández, Leire Martínez —na súa primeira xira en solitario tras a súa etapa en La Oreja de Van Gogh—, Sexy Zebras, La Habitación Roja, Dorian, Fredi Leis, Maldita Nerea, Beret —quen ofrecerá a súa única data en Galicia en 2025—, ademais de Marlon, Éxtasis, Samuraï, Hey Kid, Noan, Paula Koops e ata 12 dj’s que serán os encargados de darlle ritmo aos intercambios entre concerto e concerto, entre eles, Arroww, Haze, Adrián Gold ou Eme DJ.

As entradas para a primeira xornada do Galicia Fest, o venres 29, están xa esgotados, pero aínda é posible adquirir os últimos abonos e os tickets para o sábado 30 a través de www.galiciafest.gal.

Concertos do Xacobeo, un programa plural 

A Xunta de Galicia continúa firme na súa aposta por posicionar á comunidade galega como destino turístico de grandes eventos musicais a través dos Concertos do Xacobeo, un programa amplo e plural impulsado por Turismo de Galicia que da cobertura a todas as grandes e máis singulares citas e espectáculos musicais en 2025, como o Gozo Festival, O Son do Camiño, o Morriña Fest, PortAmérica, o Resurrection, o Río Verbena, o Galicia Fest, Maresía, Linga Urbana e máis de 160 festivais, ciclos e concertos imprescindibles en máis de 70 localidades de toda Galicia.

Na provincia de Pontevedra, Concertos do Xacobeo suma máis dunha trintena de eventos, como Portamérica, Atlantic Fest, Costa Feira, Orballo Cultural, Río Verbena ou Revenidas.

Máis de 800 artistas internacionais, nacionais e galegos de todos os xéneros que pisan forte nas listas de escoitas de agora e de sempre visitarán neste 2025 os Concertos do Xacobeo. O programa completo está recollido na páxina web www.concertosdoxacobeo.gal.