Di que Abel Caballero só se dedica a defender a Sánchez mentres Alberto Varela só fai oposición á Xunta e dá visibilidade a Gonzalo Caballero
Alfonso Villares anuncia a reclamación que o municipalismo galego fará ao Executivo central dos 54 millóns de euros que debe aos entes locais e aos entes provinciais
O secretario xeral do PPdeG, Miguel Tellado, pediu que tanto a Fegamp como a FEMP volvesen ser órganos de defensa de todos os concellos e deputacións e non simples apéndices da propaganda do Partido Socialista.
Trala reunión que mantivo xunto ao vicepresidente primeiro da Fegamp e alcalde de Cervo, Alfonso Villares, con representantes do Consello Federal desta entidade, Tellado apuntou que tanto a Federación Galega de Municipios e Provincias como a Federación Española de Municipios e Provincias foron historicamente dúas institucións que, con independencia de quen as presidise, estiveron ao servizo do municipalismo. “Sempre estiveron gobernadas polo consenso e a vontade de acordo para mellorar a vida dos veciños, tanto en mandatos do PP como en mandatos do Partido Socialista”, insistiu.
Ademais, o número dous do PPdeG lembrou que os populares levan semanas advertindo desa utilización partidista que está a facer o PSOE tanto da Fegamp como da FEMP. Nese senso, indicou que Abel Caballero abdicou das súas funcións como defensor do municipalismo español para ser só un defensor máis de Pedro Sánchez; mentres Alberto Varela, o alcalde de Vilagarcía, “non sabemos se chegou a defender nalgún momento os intereses do municipalismo galego, pero si sabemos que está empregando o seu cargo unicamente para facerlle oposición á Xunta e para darlle a Gonzalo Caballero unha visibilidade que os galegos lle negaron nas urnas”.
Reclamar os 54 millóns que debe o goberno central
Pola súa banda, Villares referiuse aos 54 millóns de euros correspondentes á liquidación do IVE do exercicio de 2017 que o Executivo central lle debe ás deputacións e aos concellos galegos. Sobre isto, avanzou que a reclamación destes cartos vai ser unha “petición que se vai facer desde o municipalismo galego ao Goberno”. “Xa en 2018 -engadiu o alcalde de Cervo- foi reclamado e que seguimos reclamando, pero que non atopamos ningunha contestación positiva para a devolución deste diñeiro”.
Así detallou que, dos 54 millóns de euros, ao concello da Coruña débeselle 3,2 millóns de euros; ao de Santiago, 1,16; ao de Lugo, 1,1; ao de Ourense, 1,4; ao de Vigo, 3,7; ao de Pontevedra, preto de 900.000 euros; e ao de Ferrol, 774.000 euros. No que corresponde ás deputacións, á da Coruña correspóndenlle 9,8 millóns de euros; á de Lugo, 4; á de Ourense, 4,5; e á de Pontevedra, 8 millóns de euros.
Tal e como salientou, os concellos necesitan de liquidez para facer fronte ás necesidades sanitarias, sociais e económicas derivadas da pandemia. Por iso, avanzou que desde a Fegamp se lle comunicará a todos os concellos galegos esta información “para que saiban que o Estado lle debe estes 54 millóns de euros”.
