Subliñan que un informe municipal detalla que na rede de Vigo están rexistrados 72 puntos de alivio que, ao estar insertados nunha rede de tipo unitario, e dada a falta de capacidade para facer fronte a episodios de precipitacións, entran en servizo con frecuencia durante os períodos de chuvia
Ecoloxistas en Accion emitiu hoxe un comunicado no que celebra que o Concello de Vigo recoñeza as deficiencias no seu sistema de depuración de refugallos, como así se reflicte, apuntan, no informe municipal «Análise das necesidade de investimento en infraestructuras para a xestión do ciclo integral da auga».
O informe, subliñan, detalla que na rede de Vigo están rexistrados 72 puntos de alivio que, ao estar insertados nunha rede de tipo unitario, e dada a falta de capacidade para facer fronte a episodios de precipitacións, entran en servizo con frecuencia durante os períodos de chuvia. No propio informe sinálase a necesidade de adaptación destes puntos de alivio dotandolos de sistemas de pretratamento para limitar a contaminación por sólidos grosos e flotantes. Tamén é necesario instalar tanques de tormenta que permitan reter as primeiras augas de chuvia, máis contaminadas.
Ecoloxistas en Acción recalca que debe acometerse a eliminación de todas as verteduras subsanando as deficiencias da rede de saneamento. Segundo o informe as periódicas campañas de inspección da rede teñen detectado a existencia de algúns puntos de verteduras sistemáticas para o que demandan un investimento necesario de 1.717.000 euros. Entre as actuacións máis urxentes destacan puntos negros como en Cabral (rúa Fontiñas) ou Teis (r/ Xorxa, r/Arnela, contorna do río Paraixal).
Outro punto negro é o colector de marxe do río Lagares. O informe sinala que resulta igualmente necesario dotar ao colector de marxe de ría de tanques de tormenta que permitan reter as primeiras augas de chuvia (máis contaminantes) e laminar os excesos de caudais, limitando os alivios ao medio e os riscos de inundación.
Tamén compre a renovación do colector marxe de ría que discorre paralelo ao borde marítimo dende Guixar (r/ Xulián Estévez) ata a EDAR do Lagares, recollendo no seu percorrido os principais colectores de saneamento do casco urbano. É urxente actuar para subsanar a falta de capacidade deste colector o que provoca verteduras de refugallos sen tratar á ría cando se producen episodios de chuvias.
Ecoloxistas en Acción agarda «que o informe realizado serva de folla de ruta para o goberno municipal resolva as graves deficiencias da rede de saneamento municipal e non quede nunha mera escusa para aplicar un incremento tarifario». «As augas residuais sen tratar reducen a cantidade de osíxeno e afectan á proporción de nutrientes, provocando un crecemento excesivo de algas e outras plantas, o que afecta negativamente á fauna e flora do ecosistema acuático no que se verten. Como resultado, prodúcese un impacto moi negativo sobre o valioso ecosistema costeiro que afecta tamén a actividades produtivas como a pesca e o marisqueo», engaden.
Ademais, apuntan, «existe o perigo de propagación de substancias tóxicas e/ou patóxenos contidos nestas augas, procedentes principalmente do tractos intestinais, que poden provocar a transmisión de enfermidades». Ecoloxistas en Acción demanda ao Concello de Vigo que complete a rede con separativa o antes posible, que subsane todas as deficiencias advertidas no informe eque manteña unha vixiancia activa para corrixir fallos no sistema.