En cumprimento da sentencia ditada polo Tribunal Superior de Xustiza de Galicia (TSXG), os servizos mínimos dispostos polo Concello para cubrir os paros parciais convocados sufrirán alteracións para adaptarse a esta nova resolución.
Ata agora, os autobuses que se encontraban circulando no momento no que se iniciaba o paro parcial seguían prestando servizo recollendo e deixando viaxeiros durante a primeira media hora. A partir dese momento, o autobús continuaba facendo o seu percorrido ata o remate da liña, permitindo só a baixada de usuarios, non sendo posible a recollida dos mesmos.
A partir do próximo luns 13 de novembro os paros parciais afectarán nas franxas horarias 07:00 – 08:30, 12:30 – 15:30, 19:00 – 20:30 horas en día laborable, e 18:30 – 21:00 horas en sábado e domingo. Por mor desta sentencia, os autobuses que non realicen servizos mínimos, no caso de que os condutores secunden a folga, non circularán dende o inicio das franxas horarias de paros parciais.
«Polo tanto, para evitar ter que deixar aos nosos viaxeiros lonxe do seu destino seguindo esta nova medida, o que significaría unha situación de trastorno, incerteza e mesmo de seguridade no caso de colectivos vulnerables, reduciranse algunhas viaxes iniciadas antes do comezo do paro», sinalan dende Vitrasa.
Os servizos mínimos adaptaranse a esta sentencia e toda a información relativa a horarios e liñas afectadas será publicada nas próximas horas na web www.vitrasa.es e en redes sociais.