Tamén se poden activar cun mando a distancia que configura o Concello e que a ONCE distribúe entre os seus usuarios
O alcalde de Vigo, Abel Caballero, avanzou esta mañá a colocación de 5 novos semáforos acústicos para invidentes, o que elevará a cifra total a 185 en toda a cidade. Todos eles actívanse a través do bluetooth do teléfono móbil ou cun mando a distancia que configura o Concello para que a ONCE os poida distribuir entre os seus usuarios.
Esta tecnoloxía reduce en gran medida a contaminación acústica que xeraban sistemas anteriores con avisos sonoros activos desde as 07.00 ata ás 23.00 h, o que causaba moitas molestias entre a veciñanza.
Na actualidade, este sistema ten a vantaxe de atender aos discapacitados visuais todo o día ao tempo que se reducen as molestias acústicas nocturnas.
Os cinco novos semáforos vanse instalar nos seguintes cruces: Avda Aeropuerto-Camiño Fonte da Barca; Estrada Valladares-Camiño Portal; Avda Aeropuerto-Pardavila; Travesía de Vigo-Buenos Aires e confluencia das rúas Florida-Tui.