A formación desenvolverase do 26 ao 30 de maio con temas como IA, fotografía de produto, impresión 3D e SEO
A Deputación de Pontevedra organiza esta semana seis novos obradoiros formativos ao abeiro da Rede SmartPeme+, dirixidos a persoas emprendedoras, autónomos e pemes da provincia que desexen mellorar as súas competencias tecnolóxicas.
Entre o 26 e o 30 de maio, a programación inclúe sesións telemáticas e presenciais sobre temas de actualidade:
- IA como ferramenta de márketing (luns 26, en liña desde Cambados)
- Fotografía de produto para e-commerce (martes 27, presencial en Cambados)
- Apps para axendar citas no teu negocio (martes 27, en liña desde Lalín)
- IA e deseño para impresión 3D (mércores 28, en liña desde Barro)
- Como empregar IA para SEO (xoves 29, en liña desde Pontevedra)
- Introdución ao Lean Startup (venres 30, presencial en Ponteareas)
Estas accións forman parte dunha rede que asesora cada ano a 2.500 persoas emprendedoras, con máis de 200 actividades formativas. Este ano, a Deputación destina 1,45 millóns de euros á Rede SmartPeme+ e Acelera Pyme Rural, co obxectivo de impulsar a transformación dixital no rural pontevedrés e acompañar a creación de novas iniciativas empresariais.