Reumatoloxía do CHUVI e o Grupo de Investigación IRIDIS organizan unha videoconferencia sobre o lupus nos tempos da COVID19

O acto enmárcase dentro da celebración, ao longo do mes de maio, dos eventos relacionados co  Lupus Eritematoso Sistémico

A sesión está dirixida a resolver as dúbidas dos pacientes con esta patoloxía, pero é aberta ao público en xeral

O evento celébrase mañá  venres 29 de maio e pódese seguir a través da ligazón  http://mayo2020-lupus-covid19.iisgaliciasur.es/

Na Área Sanitaria de Vigo están diagnosticados de  Lupus uns 300 pacientes e a prevaleza mantense nos últimos anos

O servizo de Reumatoloxía do CHUVI e o Grupo de Investigación IRIDIS do Instituto de Investigación Sanitaria Galicia Sur organizarán  mañá venres unha videoconferencia que versará sobre distintos aspectos do Lupus Eritematoso Sistémico (LES) nos tempos da COVID19.

Ardan

A sesión está orientada a resolver e aclarar as dúbidas dos pacientes con lupus con respecto á incidencia da infección por SARS-Coronavirus-2 nos doentes con esta enfermidade e, sobre todo, a relación coa súa medicación. Hai que ter en conta que un dos tratamentos base para os pacientes con Lupus é a hidroxicloroquina, un fármaco que se empregou, asociado con outros, nos enfermos diagnosticados de coronavirus ao comezo da pandemia, aínda que nestes momentos detivéronse os ensaios clínicos con este fármaco para o seu uso contra o COVID19.

O reumatólogo José María Pego Reigosa, responsable do Grupo de Investigación IRIDIS, organiza o evento, que se enmarca na celebración, durante todo o mes de maio, dos actos relacionados co Lupus, e explica que “será unha sesión moi didáctica, orientada aos pacientes e ás asociacións, que mostraron inquietudes durante estes meses pola incidencia da COVID19 nas persoas con enfermidades reumatolóxicas sistémicas”.

Na Área Sanitaria de Vigo están diagnosticados de Lupus ao redor de 300 pacientes. A prevaleza desta patoloxía probablemente non se incrementou nos últimos anos, segundo o doutor Pego, “aínda que se avanzou nos diagnósticos precoces da enfermidade”.

Sesión aberta á a cidadanía

A videoconferencia “O Lupus nos tempos da COVID19” comezará ás 16,30 horas de  mañá  venres. Os interesados en participar na mesma poderán facelo a través da ligazón http://mayo2020-lupus-covid19.iisgaliciasur.es/

Aínda que a invitación para participar fíxose a través das  asociacións de pacientes, tanto provinciais como a nivel galego, o acto é aberto á cidadanía. A sesión iniciarase ás 16:30 horas e está previsto que conclúa sobre as 18 horas deste venres.

No mesmo intervirán profesionais do Servizo de Reumatoloxía e de Farmacia do  CHUVI, que abordarán, a través de vídeos de curta duración, os aspectos máis de actualidade da enfermidade. Tamén asistirán membros do Servizo de Medicina preventiva que actualizarán a situación das vacinas frente ó coronavirus así como aspectos de Medicina do traballo, importantes para estas doentes. Así, entre outros temas, tratarase de: “As consultas co  Reumatólogo en tempo de COVID19”, “O  Lupus e o traballo en tempos da COVID19”, “Fármacos para o Lupus e risco de COVID19”, “A hidroxicloroquina e o Lupus”, “A hicroxicoloquina no tratamento da COVID19”, e “Os ensaios clínicos sobre Lupus en tempo da  COVID19”. Ademais destes aspectos concretos, a sesión está aberta a falar doutros asuntos  relacionados có Lupus que poidan resultar de interés para os asistentes.