Na área sanitaria de Vigo o orzamento chega ata os 17.348.010 euros para un servizo que comprende transporte sanitario terrestre non urxente e hospitalario urxente
O Servizo Galego de Saúde vai investir un total de 67.506.883 euros no transporte sanitario non urxente e hospitalario urxente nas sete áreas sanitarias. Así o aprobou o Consello da Xunta na súa xuntanza de hoxe, logo de autorizar a contratación deste servizo. A prestación deste servizo terá unha duración de tres anos.
O contrato ten por obxecto a prestación do servizo de transporte sanitario terrestre non urxente (ambulatorio e hospitalario) e hospitalario urxente, para os pacientes beneficiarios da Seguridade Social protexidos polo Servizo Galego de Saúde.
Este servizo atinxe tanto o que se realiza dentro das áreas sanitarias anteriormente ditas como entre as distintas áreas de saúde da Comunidade Autónoma. Ademais, inclúense os traslados fóra de Galicia cando sexan por conta das xerencias e, excepcionalmente, traslados internacionais de enfermos aos cales exista o deber legal e convencional de prestar os ditos servizos en vehículos especialmente acondicionados para o efecto.
Deste importe de máis de 67 millóns de euros, un total de 12.255.500 euros corresponden ao transporte para a área sanitaria da Coruña e Cee; 14.267.481 euros para a de Lugo, A Mariña e Monforte de Lemos, mentres que para a área sanitaria de Pontevedra e O Salnés se dedican 11.476.778 euros. Na área sanitaria de Vigo o orzamento chega ata os 17.348.010 euros e na de Santiago de Compostela e Barbanza aos 13.583.974 euros; na de Ferrol é de 8.415.873 euros.
A presente contratación ten como obxectivo dar cumprimento ao disposto no Real decreto 1030/2006, do 15 de setembro, polo que se establece a carteira de servizos comúns do Sistema Nacional de Saúde en relación co transporte sanitario das persoas con discapacidade, cando esta lles impida desprazarse nos medios comúns de transporte.
Ademais, está previsto aprobar no vindeiro Consello da Xunta o importe de 14.881.726 para a área sanitaria de Ourense, Verín e O Barco de Valdeorras.