O químico ruso Nicholas A. Kotov converterase no 29º doutor honoris causa pola Universidade de Vigo

O químico ruso Nicholas A. Kotov (Foto: Universidade de Michigan)

A Universidade de Vigo sumará nos vindeiros meses un novo doutor honoris causa, que se converterá no número 29 da institución académica viguesa. A proposta dos profesores Luis Liz Marzán e Miguel Correa Duarte, aprobada por unanimidade en setembro do ano pasado polo Departamento de Química Física da UVigo, recibiu este martes o respaldo, por asentimento, dos membros do Consello de Goberno da UVigo, que recoñecen coa concesión do grao de honoris causa ao químico ruso Nicholas A. Kotov os seus logros en materia de nanoestruturas biomiméticas, que permitiron importantes avances tecnolóxicos, así como a súa colaboración, desde hai anos, con investigadores e investigadoras da UVigo. “É un exemplo de como a ciencia básica pode ter aplicacións de grande interese”, sinalou a vicerreitora de Investigación da UVigo, Belén Rubio, en relación con Kotov, a quen o reitor, Manuel Reigosa definiu como “unha persoa sinxela, que será un grande activo na UVigo como doutor honoris causa”. 

A aprobación da concesión do grao de honoris causa a Nicholas A. Kotov foi un dos asuntos que este martes se abordou na sesión ordinaria de Consello de Goberno, na que tamén se deu luz verde a un total de 76 premios extraordinarios de grao e doutoramento que serán entregados o vindeiro venres no acto de celebración de San Tomé. Así mesmo, as e os integrantes do órgano de goberno da UVigo tamén aprobaron por asentimento as declaracións de interese de modificación e verificación de títulos de grao, mestrado e doutoramento, entre os que destaca como novidade a luz verde ao Máster en Enfermaría, que estaría adscrito á Facultade de Fisioterapia do campus de Pontevedra, ata que non se cree a Facultade de Enfermaría. Neste sentido, o reitor avanzou conversas coa Consellería de Sanidade para iniciar o trámite de desascrición dos tres centros adscritos de Vigo, Ourense e Pontevedra. “A desascrición será progresiva, de xeito que os centros vaian desaparecendo, incorporándose a unha única facultade, con docencia nos tres campus e ligado aos complexos hospitalarios de cada unha das tres cidades”, explicou o reitor, que tamén confirmou o recente nomeamento dun decano comisario, Rafael Durán Barbosa, para un proceso, que lembrou será longo, “aínda que é unha aposta que ten que saír o antes posible”, dixo Reigosa.

Quen é o próximo doutor honoris causa da UVigo? 

Recoñecido internacionalmente polos seus descubrimentos fundacionais no campo das nanoestruturas biomiméticas, Nicholas A. Kotov é docente e investigador da Universidade de Michigan, que no ano 2020 lle outorgou o recoñecemento Irving Langmuir Distinguished University Professor of Chemical Sciences and Engineering, un dos máximos honores que concede esta institución. Ademais dos seus grandes logros científicos no campo das nanoestruturas biomiméticas, que transcederon a numerosas disciplinas, desde a enxeñaría química, ata a ciencia dos materiais, Kotov tamén destacou pola súa capacidade para recrear no seu laboratorio o proceso universal mediante o que ten un lugar a ensamblaxe de estruturas biolóxicas moi complexas, así como o descubrimento das vías que utiliza a natureza para crear estes materiais complexos. Con esta visión, o químico, nacido en Moscova no ano 1965, sintetizou un gran número de materiais con propiedades extraordinarias que previamente se consideraban inalcanzables. 

Moitos dos descubrimentos realizados por Nicholas A. Kotov contaron coa colaboración de investigadores da UVigo, como é o caso, desde 1997, de Luis Liz Marzán, e o entón estudante de doutoramento e agora catedrático do Departamento de Química Física Miguel Correa Duarte. No seu traballo conxunto, aplicaron o método de ensamblaxe capa-por-capa para controlar a estrutura na nanoescala de nanocompostos biomiméticos magnéticos e fotoluminiscentes, dando como resultado un importante número de publicacións. Pola súa banda, durante a elaboración da tese da profesora Isabel Pastoriza, identificáronse as propiedades plasmónicas e biolóxicas esenciais de diversos nanocompostos autoensamblados. Varios destes estudos resultaron fundamentais para o desenvolvemento do campo dos materiais biomiméticos e bioinspirados, permitindo avances tecnolóxicos relacionados coa electrónica, tecnoloxías enerxéticas, descubrimento de fármacos, implantes biomédicos e robótica.

Kotov publicou más de 370 artigos nas revistas de maior prestixio, un 20% deles en Science, Nature ou Journal of the American Chemical Society, tres das revistas científicas do mundo no ámbito da química máis importantes. O seu impacto académico revela un índice h de 138, con máis de 70.000 citas, un dos máis elevados do seu campo. Recoñecido polo Departamento de Defensa de EEUU, a American Chemical Society ou a Royal Society of Chemistry, Kotov tamén converteu ao longo da última década a súa investigación en seis empresas start-up, todas elas relacionadas coas tecnoloxías biomiméticas.

Logo da aprobación hoxe, por parte do Consello de Goberno, da concesión do grao de honoris causa a Nicholas A. Kotov, o químico ruso converterase no 29º honoris da UVigo, sucedendo a Jacquelyn C. Campbell, profesora da Universidade Johns Hopkins de Estados Unidos, investida, no ano 2018, polos seus pioneiros estudos de xénero e considerada na actualidade unha das máis sobresaíntes académicas no escenario internacional en materia de violencia contra a muller, especialmente nas relacións de parella.