A Xunta de Goberno aprobará este venres a contratación das obras da cuberta do colexio Frián-Teis cun importe próximo ao medio millón de euros
O alcalde avanzou que este venres o goberno local aprobará a licitación da cubrición do patio do colexio Frián-Teis. Esta acción supón un investimento de case medio millón de euros.
Abel Caballero sinalou que o obxectivo desta acción, como se está a facer nos colexios públicos de Vigo, é que os nenos e nenas poidan facer deporte e recreo tamén os días de choiva.
As obras inclúen unha cuberta lixeira no patio exterior, translúcida, composta de paneis realizados con placas de policarbonato e pechada parcialmente cun faldrón continuo. «Crearemos unha zona porticada de comunicación entre o patio e o interior do centro escolar para que o alumnado poida desprazarse por esa zona cuberta nos días de choiva sen mollarse», sinalou. Aproveitando o desnivel, crearase un espazo para almacenaxe e unha pequena bancada no espazo de diferente cota entre o terreo e a pista deportiva. Amais, renovarase o pavimento da pista deportiva, actualmente en mal estado, e vai adaptarse a zona verde axardinada da nova edificación.
O alcalde lamentou que “non sexa a Xunta quen faga este tipo de obras” e que “O Bloque e Marea de Vigo non apoien a obra”.