Abel Caballero explicou que “estamos realizando unha gran humanización no exterior das gradas de Tribuna e Marcador Centenario”, que provocarán “a alteración do tráfico”
“Os vehículos que proveñan de Pablo Iglesias e Manuel de Castro terán que circunvalar o estadio por rúas como Olímpicos, Avenida de Citröen e Val Miñor”, anunciou o alcalde da cidade, para expresar que “estamos realizando unha humanización moi importante na zona” que se encontra na fase de“formigonado”. A previsión era que os traballos estiveran rematados para o partido do Celta- Real Madrid”, que se celebra o sábado 19 de outubro e, aínda que as adversidades meteorolóxicas supoñen un obstáculo, o Concello prevé ter unha parte moi importante das obras listas.
O rexedor destacou que se trata dunha actuación “nunha zona altamente habitada”, polo que “queremos que teñan unha boa humanización”. En toda a contorna “imos a recuperar, para os peóns, o espazo que ata agora se utilizaba de aparcadoiro”, xa que é un espazo “para a xente e o seu goce”.
A inversión total é de 1.831.856 euros e incluirá melloras como a instalación dunha nova marquesiña para a parada do autobús e un novo photocall co nome do Estadio Municipal de Balaídos. Caballero detallou que se renovará a rede de iluminación e o mobiliario urbano, e que a zona contará cunha rede de rega por goteo. Finalmente, as actuacións tamén implicarán a reposición da rede de pluviais coa finalidade de abordar a solución para os problemas que provocan as inundacións, así como a instalación de sumidoiros nos desniveis entre o pavimento peonil e o rodado para que poidan reter auga, ademais da instalación de novos tubos de pluviais con maior capacidade que os actuais.