Durante esta semana máis de 300 especialistas debaterán sobre as innovacións en todas as áreas de coñecemento da patoloxía cardiovascular
O hospital Álvaro Cunqueiro será, desde hoxe e ata o próximo xoves día 10, o epicentro internacional da patoloxía cardiovascular, xa que celebra “La semana de la innovación en Medicina Cardiovascular”, na que participarán en formato mixto, presencial e on line, máis de 300 especialistas nacionais e internacionais.
Este III simposio, que será inaugurado na tarde hoxe polo conselleiro de Sanidade, Julio García Comesaña, está organizado polo servizo de Cardioloxía da Área Sanitaria de Vigo, a Fundación Hospitalaria de Investigación Cardiovascular (FIC) e a Fundación Biomédica Galicia Sur.
Segundo explica o codirector científico, o xefe de servizo de Cardioloxía, Andrés Íñiguez “trátase dun congreso de innovación, que ten por obxecto actualizar o avance do coñecemento na patoloxía cardiovascular; coñecer as innovacións con verdadeiro valor engadido en prevención, diagnóstico e terapéutica farmacolóxica ou intervencionista; e expoñer os resultados de proxectos de gran impacto en investigación nesta área” .
De feito, no programa a desenvolver, todas as sesións están focalizadas nas innovacións desta patoloxía. Así, no día de hoxe abordáronse os adiantos en cardioloxía intervencionista e en electrofisioloxía e arritmias; maña, na imaxe cardiovascular, prevención de risco e rehabilitación cardíaca; o mércores, nas novas achegas en coidados cardiolóxicos agudos e tratamentos farmacolóxicos; e o xoves, nas novidades en sistemas de información e modelos organizativos así como nos avances na Investigación cardiovascular.