O hospital instalou un punto de valoración con microespirómetros para mellorar o diagnóstico temperán dunha enfermidade moi infradiagnosticada
A Área Sanitaria de Vigo sumouse á celebración do Día Mundial da Enfermidade Pulmonar Obstrutiva Crónica (EPOC) cunha xornada centrada na prevención, información e diagnóstico temperán. Profesionais do servizo de Pneumoloxía instalaron un punto informativo no Hospital Álvaro Cunqueiro, onde realizaron medicións respiratorias con microespirómetros para avaliar a función pulmonar e mesmo calcular a chamada idade pulmonar.
Unha patoloxía moi común pero pouco coñecida
A EPOC é unha enfermidade asociada principalmente ao consumo de tabaco e caracterízase por unha obstrución crónica das vías respiratorias. Aínda que é a terceira causa de morte no mundo, continúa sendo unha das máis infradiagnosticadas: en Galicia afecta ao 16% das persoas maiores de 40 anos, pero tres de cada catro non o saben.
Segundo a doutora Cristina Represas, especialista de referencia na área, “un diagnóstico temperán mellora os síntomas, a calidade de vida e o prognóstico, polo que é clave consultar ante signos como dificultade para respirar, tose persistente ou infeccións respiratorias frecuentes”.
Formación para profesionais sanitarios
Durante a tarde, o Colexio Médico de Vigo acolle tamén unha xornada dirixida a profesionais baixo o título “Outra forma de ver a EPOC”, organizada xunto coa Fundación Pública Galega de Investigación Biomédica Galicia Sur. Nela abordaranse aspectos sociais, psicolóxicos e clínicos desta enfermidade.