“Quero que sexa a voz das ucraínas e dos ucraínos na festa”, anunciou o alcalde este venres: “Este ano a Reconquista levará as cores da bandeira de Vigo e tamén as da bandeira de Ucraína”
Abel Caballero continuou este venres desvelando as propostas para recibir as distincións na gala que se celebrará o mércores, 23 de marzo, e que se suman ás xa anunciadas en días anteriores. E ademais revelou que a situación do pobo ucraíno, país que está a ser atacado polo exército de Putin, ocupará un espazo relevante na Reconquista deste 2022.
Marta Skyba, a responsable en Vigo da Asociación Galega de Axuda a Ucraína, será a encargada de ler o pregón. Skyba é unha “viguesa nacida en Ucraína”, en verbas de Caballero, residente na cidade desde hai máis de oito anos e unha muller “que sempre traballou coa colectividade de Ucraína en Vigo, viguesa de pro e moi involucrada no entorno”.
O alcalde vigués expresou que “quero que (Marta Skyba) sexa a voz das ucraínas e dos ucraínos na Reconquista de Vigo”, unha festa que este ano “levará as cores vermello e branco da bandeira de Vigo e tamén as cores da bandeira de Ucraína”.