Oriana Méndez, concelleira do Grupo Municipal da Marea de Vigo, considera unha boa nova consignar recursos á continuación do Pacto de Estado contra a Violencia de Xénero, «recursos para loitar contra esta lacra, que na cidade de Vigo se cronifica con numerosos casos diarios nunca son suficientes, polo que optimizalos e garantir a súa execución integral é absolutamente necesario».
«Segundo o informe do Consello do Poder Xudicial durante o ano 2021 (últimos datos feitos públicos), 159.354 mulleres foron vítimas de violencia de xénero. Os Xulgados de Violencia sobre a Muller rexistraron 220.483 causas penais, das cales o 63% foron por lesións e malos tratos, o 11,2% por incumprimentos de medidas de protección e o 7,6% por incumprimentos de sentenzas. Na nosa cidade por exemplo, de non tramitarse no 2021 ningunha denuncia por violencia de xénero continuada no entorno dunha parella (as menos habituais e máis custosas de levar adiante por mulleres que levan toda unha vida sufríndoa) entre xaneiro e xuño deste ano xa levamos 28» indica Oriana Méndez, polo que sinalan que estes recursos deben chegar aos Concellos para que planifiquen o seu uso de acordo ás características propias, os recursos existentes en materia de igualdade e o deseño de políticas de seguridade e organización das unidades de prevención e loita contra a violencia de xénero existentes nas policías locais.
«Especialmente necesario tamén é evitar que os recursos que hoxe consigna o consello de ministros para as Delegacións de Goberno sexan empregados en políticas apegadas ao territorio e non en meras campañas institucionais como ten acontecido no pasado con transferencias semellantes», recordan.
Marea de Vigo defende que, tal e como pretende o Pacto de Estado contra a Violencia de Xénero, entre Xunta e Concello se estableza un marco axeitado de colaboración e cooperación que permita axilidade na resposta integral, eficaz e coordinada en materia de prevención e loita contra a violencia contra as mulleres, e a protección e asistencia ás súas vítimas e asegurar a existencia, en todo o territorio do Estado, dun conxunto de servizos mínimos que garantan o exercicio efectivo dos dereitos das vítimas de violencia contra as mulleres consagrados na lexislación estatal vixente, e, en particular, na Lei Orgánica 1/2004 do 28 de decembro, de Medidas de Protección Integral contra a Violencia de Xénero, e na Lei Orgánica 10/2022, do 6 de setembro, de Garantía Integral da Liberdade Sexual. Para Marea de Vigo o principal motor desta coordinación debe ser o propio Concello de Vigo, polo que pedirá a transferencia de recursos ao Concello e a creación dun grupo de traballo permanente entre institucións.