As actividades formativas deste programa co que a Deputación está a promover o envellecemento activo e a independencia das persoas maiores na provincia comezan esta semana en 4 entidades de Baiona, Redondela, Cangas e Mondariz
Un total de 63 xubilados de 4 entidades doutros tantos concellos da provincia comezan esta semana novas accións formativas do programa provincial “Depo en marcha”. A través desta iniciativa, a Deputación de Pontevedra promove a participación e a creación de espazos de encontro e intercambio de experiencias para fomentar o envellecemento activo e a independencia das persoas maiores.
Desta maneira, nesta xornada do 9 de outubro comezan 3 cursos novos. 18 persoas da Asociación de Amas de Casa de Baiona comezarán o taller de musicoterapia; 15 da Asociación Sociedade Labrego Cultural de Reboreda de Redondela o de plantas medicinais, e outras 15 persoas da Asociación de Veciños de Pinténs de Cangas iniciarán o de pilates.
Por outra banda, o venres 13 de outubro 15 persoas da Asociación de Veciños Xabriña de Mondariz comezarán o curso de plantas municipais.
Estas son algunhas das 130 accións que se ofertaron na actual edición de “Depo en Marcha”, que beneficia a arredor de 3.000 persoas ao longo de todo o ano. A Deputación destina preto de 146.000 euros ao programa e os obradoiros enmárcanse nos seguintes apartados temáticos: ‘Aprendendo da natureza’, ‘Móvete, activando corpo e mente’, ‘Enredando’, ‘Dálle marcha’ e ‘En rede’.