A vicepresidenta da Deputación de Pontevedra, Luisa Sánchez, asistiu á inauguración da feira Navalia, que se celebra no Ifevi coa presencia de máis de 600 expositores de empresas e profesionais vinculados ao sector naval e marítimo internacional. Ademais de salientar o peso deste sector na economía da provincia, puxo en valor a capacidade de innovación e proxección exterior das empresas galegas. Igualmente, sinalou a importancia de encontros como Navalia para reforzar a actividade industrial, favorecer oportunidades de negocio e consolidar Vigo como referente mundial do ámbito naval.
A institución provincial vén de aumentar o seu apoio ao programa técnico co obxectivo de reforzar o programa de conferencias, mesas redondas e presentacións ao abeiro da Aula Deputación de Pontevedra. Estas xornadas profesionais abordarán desafíos como a transición enerxética ou a dixitalización mediante intelixencia artificial.