Os beneficios dos autores da obra, que narra a historia de sidi e o seu pai acolledor, serán destinados á ONG Tierra de hombres
A libraría Librouro de Vigo acolle este venres, 12 de maio, ás 20h, a presentación do libro póstumo de Lino Braxe Sidi, unha viaxe cara a vida / Sidi, un viaje hacia la vida, editado por Hércules de Ediciones. No acto, participarán María Braxe, irmá de Lino e autora das ilustracións; Mario Garrido, de Hércules de Ediciones; e Raúl Besada, delegado de Tierra de Hombres en Galicia, ONG á que irán destinados os beneficios dos autores e coa que o escritor e dramaturgo mantiña unha estreita colaboración.
De feito, a historia de Sidi, o rapaz protagonista do libro, que desde un remoto lugar situado entre dous mundos emprende unha viaxe física e emocional que cambiará para sempre a súa vida e a de Raúl, o seu cariñoso pai acolledor, é un exemplo do traballo que fai o programa “Viaxe cara a vida” da entidade solidaria. A publicación está editada en galego e castelán.
Sobre o autor
Poeta, narrador, actor e dramaturgo, Lino Braxe comezou no teatro profesional en 1985, coa Compañía Luís Seoane. Actuou en producións da Escola Dramática Galega, do Centro Dramático Galego e Malbarate, entre outras, e tamén foi actor de dobraxe e locutor de RNE durante dez anos, tempo no que adaptou para a radio a obra dramática completa de Álvaro Cunqueiro e Eduardo Blanco Amor.
Foi así mesmo un dos fundadores da revista Luzes de Galiza e dirixiu ata o seu pasamento o grupo de teatro da Agrupación Cultural Alexandre Bóveda. Este libro é unha mostra da súa xenerosidade e da súa implicación no traballo da ONG Tierra de Hombres, coa que colaborou desde o principio.