O presidente da Deputación, acompañado pola deputada de Turismo Nava Castro e membros do goberno provincial, estrean por primeira vez na provincia, antes que en Fitur, a campaña de Turismo Rías Baixas
“Temos un interior único, con recursos patrimoniais e naturais de primeiro nivel, así como con produtos estrela como os percorridos a carón da camelia ou rutas como o Camiño Taverneiro”, explica a deputada de Turismo, Nava Castro
O presidente da Deputación de Pontevedra, Luis López, presenta unha campaña de promoción do destino turístico Rías Baixas inédita na que “mar de beleza e sensacións” do interior da provincia é o protagonista principal. Baixo o lema “Cando volves?”, o proxecto busca poñer en valor as experiencias e atractivos turísticos dos 61 concellos da provincia para convidar a todo o mundo a desfrutar dun destino sustentable, desestacionalizado e descentralizado. “O regato, o val e o prato do interior é tan Rías Baixas como a ría, a illa ou a batea da costa. Todo forma parte desta provincia extraordinaria, e merece ser atendido en igual proporción. Así que tras gravar en corenta localizacións, 23 concellos, e 100% enclaves de interior, presentamos hoxe unha viaxe colectiva de hospitalidade, afecto, raíces, sustentabilidade e equilibrio territorial que nos fai sentir moi orgullosos”, explicou o mandatario provincial o sentido dunha campaña presentada este martes no xardín do hotel Numa Experimental de Tomeza, en Pontevedra, nun acto no que tamén participou a deputada de Turismo, Nava Castro.
Por primeira vez a Deputación presenta o contido da súa campaña de promoción do destino turístico Rías Baixas na provincia —a vindeira semana presentarase na Feira Internacional de Turismo de Madrid—, nunha xornada que comezou coa proxección dun vídeo producido por Esmerarte baseado en imaxes de lugares e experiencias propias do interior da provincia, como a observación de estrelas, unha xornada de baño nun río ou a tradición do magosto; que rematou desvelando o slogan da campaña: Cando volves?. Logo, a presentadora do acto, Noa García, convidou a subir ao escenario á deputada de Turismo, Nava Castro; e ao vicepresidente do Clúster de Turismo de Galicia, Alfonso Martínez. Así mesmo, a chelista Margarida Mariño foi a encargada de poñer a nota musical ao acto, no que tamén participaron a artesá Olalla Lojo e a astrónoma Mónica Pereira. Na presentación da campaña estiveron tamén presentes os vicepresidentes Rafa Domínguez e Luisa Sánchez, así como outros membros do goberno provincial.
“O interior é o gran descoñecido, aínda que cada vez menos. Temos un interior único, con recursos patrimoniais e artísticos de primeiro nivel e tamén con recursos naturais que nos levan a gozar de ríos ou carballeiras, así como de produtos estrela desta provincia, como os percorridos a carón da camelia, a flor das Rías Baixas ou rutas como o Camiño Taverneiro. Recursos aos que hai que engadir as nosas xentes, que tamén son protagonistas desta campaña”, salientou a deputada.
Neste sentido, o presidente Luis López fixo fincapé en que o enfoque da campaña turística impulsada este ano pola Deputación este ano é completamente novidosa. “Nunca antes a Deputación presentara a súa campaña en casa antes de facelo fóra, nunca antes se fixera unha campaña onde o anfitrión fóra tan protagonista como o visitante, nunca antes unha campaña provincial decidira cambiar completamente o mar das Rías polo mar de beleza e sensacións do interior e nunca antes se lanzara unha campaña onde se vira con tanta claridade que as Rías Baixas están compostas por 61 concellos”, afirmou o dirixente.
Liderado
Unha campaña de promoción do destino que casa á perfección coas liñas da Estratexia Rías Baixas Turismo 61 posta en marcha pola Deputación o pasado verán co obxectivo de reforzar o liderado turístico dunha provincia que é a máis visitada de Galicia e a favorita do norte de España, que acapara a atención do turismo estranxeiro, que medra nun 25 % e no que un de cada tres visitantes procede de fóra das nosas fronteiras; ou que segue avanzando na desestacionalización a través de programas novidosos e de éxitos como o Lecer en Familia. “Imos polo bo camiño”, asegura López facendo referencia aos datos de visitantes de xaneiro a novembro do 2024.
Un destino turístico que conta con atractivos consolidades como os Rías Baixas Fest, o enoturismo, o turismo deportivo ou fortalezas coma as dos castelos de Soutomataior e Sobroso nunha “ecuación da que sae un destino infinito e irrepetible como Rías Baixas”, defende o presidente. Un liderado que se sustenta en cifras como os 3.200 millóns de euros xerados polo sector turístico no ano 2024, na aposta de récords que realiza a Deputación ao elevar ata os 6 millóns de euros o orzamento destinado a Turismo para aumentar o apoio a festivais e festas de interese turístico internacional así como a presenza do destino en feiras especializadas. Neste punto, adiantou o mandatario provincial que o vindeiro xoves presentarase a oferta turística das Rías Baixas en Fitur, na que as experiencias do interior da provincia e a recuperación da Bienal de Arte serán as grandes protagonistas.
“Quen visita as Rías Baixas, deixa algo aquí. Quen proba, repite. Quen vén, regresa. Por tanto, só queda facerse unha pregunta: Cando volves? A miña resposta é: en calquera momento. Esta provincia sempre merece a pena”, concluíu o presidente o acto de presentación da campaña que se pechou coa interpretación da banda sonora da proposta a cargo de Margarida Mariño.
