Con xornadas informativas e lúdicas nos tres campus

A institución académica acada taxas históricas de ocupación

O vindeiro luns 9 de setembro a Universidade de Vigo arranca oficialmente o curso 2024/2025. Co prazo de matrícula aínda aberto, faino con taxas de ocupación históricas superiores ao 100%. Co obxectivo de dar a benvida ao alumnado de novo ingreso, esta semana a institución académica celebra en cada un dos seus tres campus unhas xornadas de acollida informativas e lúdicas na que o estudantado que comeza a súa vida universitaria pode coñecer os servizos e instalacións que teñen á súa disposición. A primeira delas tivo lugar, con moito éxito de participación, este mércores no campus de Ourense.

Case 4000 novos estudantes de grao

En total, a institución académica viguesa ofertou para o curso 2024/2025 un total 3836 prazas de novo ingreso de grao (e 1733 de mestrado). Entre as novidades destaca un novo título, o Grao en Enxeñería da Automoción con mención dual, o primeiro deste tipo que se imparte en Galicia. O seu obxectivo é formar ao alumnado no campo profesional da enxeñaría industrial que se configura arredor do sector da automoción, contando para iso co respaldo de Stellantis, o Centro Tecnolóxico da Automoción de Galicia (CTAG) e o Clúster de Empresas de Automoción de Galicia (Ceaga). Xa en mestrado, a UVigo incorpora dous novos títulos interuniversitarios, os de Biofabricación e Internet das Cousas-IoT.

Tamén se ofertan por primeira vez os Programas Académicos con Percorridos Sucesivos (PARS) no ámbito da enxeñaría, sendo a UVigo tamén a primeira universidade do SUG en contar con eles. A finalidade destes programas é que o estudante reforce a súa formación integral vinculando o título de grao e mestrado, tendo a oportunidade de matricularse no mestrado antes de rematar o seu grao. Concretamente desenvolveranse os PARS en Mestrado en Enxeñaría Aeronáutica vía Grao en Enxeñaría Aeroespacial; en Mestrado en Enxeñaría Informática vía Grao en Enxeñaría Informática; en Mestrado en Enxeñaría Biomédica vía Grao en Enxeñaría Biomédica; en Mestrado en Enxeñaría de Telecomunicación vía Grao en Enxeñaría de Tecnoloxías de Telecomunicación e en Mestrado en Enxeñaría Industrial vía Grao en Enxeñaría en Tecnoloxías Industriais.

Cando aínda está aberto o prazo de matrícula, os datos de alumnado de novo ingreso son xa os mellores de toda a serie histórica de ocupación da UVigo, tal e como ten destacado o reitor da Universidade de Vigo, Manuel Reigosa, acadando taxas de ocupación superiores ao 100% nos tres campus da institución académica. No sexto chamamento para efectuar a matrícula aberto agora, das 35 titulacións de grao e dobre grao ofertadas no campus de Vigo, só cinco teñen aínda a matrícula aberta: os de Enxeñaría dos Recursos Mineiros e Enerxéticos; Linguas Estranxeiras; Tradución e Interpretación Español-Francés; Tradución e Interpretación Galego-Inglés e Filoloxía Aplicada Galega e Española. No campus de Ourense, das 19 titulacións de grao e dobres graos existentes quedan prazas en Ciencia e Tecnoloxía dos Alimentos; Ciencias Ambientais; Enxeñaría Agraria e Turismo. Das 12 titulacións de grao do campus de Pontevedra, só ten a matrícula aberta Enxeñaría Forestal.

Comezando “con enerxía”

Na xornada de benvida celebrada no pavillón de deportes do campus de Ourense, mozas e mozos puideron obter información sobre a institución académica, sobre os seus dereitos e deberes, sobre os servizos informáticos, o transporte e o aloxamento, o voluntariado e o asociacionismo, as bolsas e axudas que poden solicitar e a oferta académica complementaria que ofrece o Centro de Posgrao e Formación Permanente ou o Centro de Linguas. Tamén puideron coñecer a biblioteca universitaria, os programas de mobilidade, as iniciativas de fomento do emprego e do emprendemento e as actividades de extensión universitaria e de benestar, saúde e deporte. Non faltaron os postos de atención á diversidade, da Unidade de Igualdade e de delegacións e asociacións de estudantes.

Natalia Caparrini, vicerreitora de Estudantado e Empregabilidade da Universidade de Vigo, salientou a súa satisfacción pola acollida da xornada, estimando unha participación de arredor do 90% do alumnado matriculado de novo ingreso. “En cada centro, este alumnado xa vai ter benvidas específicas, centradas na parte académica, polo que o obxectivo destas xornadas é que coñeza os servizos e instalacións que lles ofrece a Universidade de Vigo”. Ademais de ofrecer información, apuntou, o evento ten un enfoque lúdico no que non falta a música e os agasallos, para que o novo estudantado “comece a etapa universitaria con enerxía e vexa que a universidade que escolleron para estudar é unha universidade dinámica, onde van a ter que estudar pero tamén onde o van a pasar moi ben”. Do mesmo xeito, Francisco Javier Rodríguez Rajo, vicerreitor do campus de Ourense, destacou que “comezamos contentísimos este novo curso” apuntando que “o campus de Ourense medra ano a ano en número de alumnos e as enquisas de satisfacción amosan que o noso estudantado está moi satisfeito, tanto do que aprende nas aulas como da súa experiencia vital aquí”. Os responsables académicos desexaron que este novo curso que comeza “cheo de enerxía” sexa frutífero para os diferentes colectivos da comunidade universitaria, especialmente para o alumnado que agora comeza a súa etapa universitaria.   

Entre o estudantado que este mércores se achegou a este acto de benvida estaban Irea Prada e Hugo Fernández, do Barco de Valdeorras e Monforte de Lemos. Ela comeza a estudar o Grao de Educación Infantil e el o de Educación Social, ambos na Facultade de Educación e Traballo Social. Escolleron este centro pola súa proximidade xeográfica e estas titulacións por ser as súas vocacións. Cunha boa impresión de partida da universidade, achegáronse á xornada de benvida para ir “tanteando o terreo” e comezar con bo pé a súa vida universitaria. Igualmente estaban Antía Blanco, Lucía Morales e Patricia Troncoso, de Vigo e Gondomar, e novas alumnas do Grao de Relacións Internacionais. Elas arrancan con moita gañas a súa etapa universitaria e tamén cunha moi boa impresión do campus de Ourense, destacando que “vese un campus moi dinámico, non nos agardábamos o ambiente que hai”.

Seguindo o mesmo formato e o mesmo horario de 10.00 a 13.00 h, as xornadas de benvida da Universidade de Vigo continúan mañá xoves no campus de Pontevedra, concretamente na Escola de Enxeñaría Forestal, e o venres 6 no campus de Vigo, no pavillón universitario.