A medida, sen precedentes no Estado, busca reducir a transmisión desta infección de transmisión sexual aproveitando a protección cruzada da vacina contra a meninxite B
A Xunta de Galicia estreará unha campaña de vacinación inédita en España para previr a gonorrea, unha infección de transmisión sexual en auxe, especialmente entre poboacións con prácticas de risco. A partir do 2 de xuño, a Consellería de Sanidade comezará a administrar a vacina 4CMenB, deseñada orixinalmente contra a meninxite B, ás persoas menores de 65 anos que presenten un risco elevado de contraer a infección.
A decisión baséase en estudos científicos recentes que demostran unha protección cruzada entre ambas bacterias, a Neisseria meningitidis e a Neisseria gonorrhoeae, moi próximas a nivel xenético. A medida, segundo destaca Sanidade, responde ao incremento da incidencia de gonorrea en Galicia e noutros países europeos.
A quen se lle administrará a vacina?
A poboación diana, estimada en 10.000 persoas en Galicia, está formada por individuos con condutas ou historial clínico que implican un maior risco de exposición ao gonococo. Recibirán a vacina aqueles que:
- Fosen diagnosticados nos últimos 12 meses con ITS como clamidia, sífilis, VIH ou a propia gonorrea.
- Recibiran varias veces profilaxe pre ou post exposición ao VIH ou outras ITS durante o último ano.
- Presenten sospeita clínica de gonorrea sen confirmación analítica, aínda que se recomenda sempre a toma de mostra.
- Teñan antecedentes de dúas ou máis ITS nos últimos cinco anos, excluíndo o VPH.
A vacina será dispensada dentro do Programa Galego de Vacinación, co obxectivo de previr a infección e interromper as cadeas de transmisión. A información completa está dispoñible na web de Sanidade (sergas.gal).
Sen vacina específica, pero con solucións innovadoras
Actualmente non existe unha vacina específica para a gonorrea, malia que a Organización Mundial da Saúde (OMS) leva anos sinalando a necesidade urxente de desenvolvela, debido á resistencia crecente aos antibióticos que presenta esta bacteria. A estratexia galega aposta por usar con intelixencia os recursos existentes, mentres se continúa investigando unha solución definitiva.
A vacina 4CMenB foi recomendada por entidades científicas internacionais como o Joint Committee on Vaccination and Immunisation (JCVI), precisamente por esa capacidade de inducir resposta inmune contra o gonococo.