A Consellería do Mar e o GALP Ría de Vigo-A Guarda destinan máis de 338.000 euros a iniciativas sociais, educativas e de confrarías para fortalecer a identidade mariñeira da comarca
A Consellería do Mar da Xunta de Galicia aprobou a posta en marcha de oito novos proxectos xestionados polo GALP Ría de Vigo-A Guarda, co obxectivo de difundir a cultura mariñeira e preservar o seu legado nos municipios da zona. Estas iniciativas, que contan cun investimento total de máis de 338.000 euros, están cofinanciadas polo Fondo Europeo Marítimo e de Pesca e Acuicultura (FEMPA) e a propia Consellería, nunha porcentaxe do 70% e 30% respectivamente.
Proxectos sociais vinculados ao mar
Dúas das propostas teñen un marcado carácter social. A Asociación AFAGA desenvolverá en Baiona, Nigrán e A Guarda o programa “O compás do Alzheimer”, cun orzamento de máis de 111.000 euros, que inclúe saídas para recoller lixo nas praias, obradoiros de reciclaxe, visitas a museos mariñeiros e charlas sobre o sector conserveiro. Pola súa parte, AFAMO impulsará en Vilaboa, Moaña e Cangas o proxecto “Os recordos do noso mar”, que pon en valor as historias das mulleres vinculadas ao mar, promove obradoiros interxeracionais e recupera a tradición das peixeiras locais.
Confrarías máis sostibles e innovadoras
Catro confrarías da ría tamén recibirán financiamento. A de Vigo desenvolverá “Somos Confraría II”, cun plan de comunicación e creación dun distintivo de produtos da Lonxa de Canido. A de Redondela e a da Guarda apostan pola modernización da loxística, coa compra de vehículos isotermos e ecolóxicos para mellorar a comercialización. Pola súa banda, a Confraría de Arcade transformará unha sala da lonxa nunha “Aula do Mar”, destinada á formación en xestión de recursos mariños e cambio climático.
Divulgación e preservación do patrimonio mariñeiro
Entre as iniciativas destaca tamén o proxecto CONXELAB, impulsado por Conxemar en Vigo, que creará unha maqueta dixital interactiva da cadea de valor da pesca e a acuicultura, con tecnoloxía inmersiva, xogos e retos educativos. Ademais, a Asociación de Redeiras Atalaia desenvolverá en A Guarda “Atadeiras”, unha proposta que inclúe unha web divulgativa, un espazo expositivo e paneis informativos para poñer en valor o traballo deste colectivo con dúas décadas de traxectoria.
Con estas iniciativas, a Xunta e o GALP Ría de Vigo-A Guarda reforzan a aposta por preservar a identidade mariñeira, impulsar a innovación no sector pesqueiro e favorecer a inclusión social a través do mar.