O Concello de Vigo e a Cámara de Comercio de Vigo colaborarán na organización de cursos de formación dirixidos á mocidade, que se desenvolverán nas instalacións da Casa da Xuventude de Vigo, un espazo municipal recentemente reformado polo Goberno local.
O alcalde, Abel Caballero, informou deste acordo tras manter un encontro co presidente da Cámara de Comercio, José García Costas, e co seu xerente, Víctor Varela. Segundo explicou, o Concello cederá de forma gratuíta os espazos da Casa da Xuventude para que a entidade empresarial poida impartir accións formativas cofinanciadas polo Fondo Social Europeo.
Entre as iniciativas previstas figuran cursos orientados a fomentar o emprendemento e a creación de startups, así como programas de apoio á inserción laboral. Neste ámbito destaca o programa Talento Novo PICE, dirixido a mozos e mozas de entre 16 e 29 anos que non se atopan nin estudando nin traballando, así como ás empresas interesadas en contratar persoal xuvenil cualificado.
Durante a súa intervención, o rexedor lembrou que o Concello acometeu en 2025 a remodelación integral da Casa da Xuventude, cun investimento de 99.766 euros, co obxectivo de mellorar este equipamento municipal e adaptalo a novas actividades formativas e de apoio á mocidade viguesa.