A Xunta concede axudas de ata 1.500 euros para mellorar as competencias lingüísticas en 12 países diferentes
A Xunta de Galicia facilitará que 178 estudantes universitarios viaxen este verán ao estranxeiro para mellorar os seus coñecementos de idiomas grazas ao programa Galemundo, unha iniciativa da Consellería de Educación, Ciencia, Universidades e Formación Profesional que impulsa a internacionalización do ensino.
As estadías, que terán lugar entre o 1 de xuño e o 31 de agosto, inclúen cursos presenciais con polo menos 45 horas lectivas en linguas oficiais de países estranxeiros diferentes ao español. Os destinos máis demandados son Canadá (40 alumnos), Malta (39), Irlanda (34), Italia (18), Reino Unido (16), Francia (14), Alemaña (9), Xapón (3), Estados Unidos (2), Portugal, China e Corea do Sur.
O perfil do alumnado revela unha maioría feminina (70 %) e unha ampla representación das tres universidades galegas: 67 estudantes da USC, 58 da UVigo e 53 da UDC. Por áreas de coñecemento, destacan as Ciencias Sociais e Xurídicas, seguidas por Enxeñaría, Artes, Saúde e Ciencias.
Galemundo forma parte dunha estratexia máis ampla na que participan máis de 7.000 persoas entre estudantes e docentes, cun investimento público de máis de 15 millóns de euros neste curso. A iniciativa pretende non só mellorar a formación lingüística senón tamén ampliar as oportunidades laborais e de mobilidade internacional dos mozos galegos.