O alcalde da cidade, Abel Caballero, anunciou este venres que o estadio municipal de Balaídos acollerá as finais da Vigo Cup na súa edición de 2026, unha das grandes novidades do torneo.
Segundo explicou o rexedor, o Concello xa traballa na posta en marcha dunha nova edición desta cita deportiva, considerada “o evento de balompé en fútbol base máis importante que hai en España”. A competición desenvolverase en dúas fases: a modalidade de fútbol sala celebrarase do 12 ao 21 de xuño, mentres que os torneos de fútbol 8 e fútbol 11 terán lugar do 22 ao 28 de xuño.
A Vigo Cup 2026 contará coa participación de 300 equipos e máis de 5.000 xogadores e xogadoras, que disputarán os seus encontros en 20 espazos deportivos da cidade, repartidos entre 13 campos de fútbol e sete pavillóns.
Caballero destacou que recuperar Balaídos como escenario das finais supón reforzar o carácter simbólico e a proxección do torneo, devolvendo ás categorías de base a experiencia de xogar no principal estadio da cidade e consolidando Vigo como referente estatal na organización de grandes eventos deportivos formativos.