Oito grupos de teatro afeccionado actuarán nos auditorios de barrios e parroquias da cidade
O Certame de Teatro da Agrupación de Centros Deportivos e Culturais de Vigo comeza este sábado, 4 de outubro, ás 20.00 horas, no Auditorio de Valladares, coa representación da comedia A taberna sen dono, do dramaturgo galego Manuel Varela Buxán, a cargo do Grupo de Teatro Helios de Bembrive.
Un mes de programación cultural
Durante un mes, arredor de cen actores e actrices afeccionados pertencentes a oito grupos vigueses subirán aos escenarios con comedias, dramas e creacións contemporáneas. As funcións desenvolveranse ata o 2 de novembro en diferentes auditorios veciñais e culturais.
Achegar o teatro á cidadanía
O obxectivo do certame é dinamizar a vida cultural das parroquias e reforzar o papel dos centros culturais como espazos de encontro e participación. A Agrupación organizadora, recoñecida como Viguesa Distinguida en 2011, leva tres décadas promovendo a cultura de base.