O programa, que propicia o encontro entre maiores e mocidade de toda Galicia para compartir experiencias e dialogar, quedara interrompido como consecuencia da pandemia
Afundación, a Obra Social de ABANCA pon en marcha de novo en Vigo o seu programa interxeracional «Fálame da emigración», que se vira interrompido en 2020 como consecuencia da pandemia. A iniciativa, enmarcada na liña estratéxica «O valor da experiencia», da Área de Maiores de Afundación, ten como obxectivo poñer en valor a traxectoria vital e profesional das persoas maiores a través de programas que beneficien a outros grupos da sociedade.
Mañá mércores, 22 de marzo a partir das 15.00 h desenvolverase no colexio Los Sauces de Vigo o segundo dos dous encontros que conforman o programa. Nesta xornada, as sete persoas voluntarias, socias do Espazo+ 60 de Vigo, e estudantes de primeiro de Bacharelato dialogarán na aula sobre a experiencia dos maiores na emigración e a visión de ambos sobre o pasado e presente dos movementos migratorios.