O programa permitirá adquirir e reparar instrumentos musicais e vestiario para apoiar o labor cultural e social destas agrupacións
O presidente da Deputación de Pontevedra, Luis López, definiu ás bandas de música populares como “os compositores da banda sonora da provincia” durante a clausura do XVIII Certame Galego de Bandas de Música Populares, celebrado no Pazo da Cultura de Pontevedra. Acompañado polo deputado de Cultura, Jorge Cubela, o mandatario provincial destacou o papel destas agrupacións como motor de cohesión social e anunciou un programa pioneiro de subvencións dotado con 200.000 euros para apoiar a súa actividade mediante a adquisición e reparación de instrumentos e vestiario.
Un apoio económico para manter viva a tradición musical
As novas axudas, impulsadas pola Deputación, destinarán 170.000 euros á compra e reparación de instrumentos e outros 30.000 ao vestiario das formacións musicais. Cada banda poderá recibir ata 3.000 euros de apoio, segundo explicou López, quen subliñou que o programa busca recoñecer o esforzo e o compromiso das agrupacións locais, que poñen o seu tempo e talento ao servizo da cidadanía.
“Poñedes o voso tempo, o voso talento e moitas veces os vosos recursos ao servizo da xente. E esa achega debe ter unha resposta real, non só boas palabras”, afirmou o presidente provincial, quen defendeu que este plan é “un recoñecemento e unha colaboración coas agrupacións que manteñen vivas a nosa música, as nosas festas e os nosos bailes tradicionais”.
O certame, punto de encontro da música popular galega
O Pazo da Cultura de Pontevedra acolleu durante a fin de semana a participación de 21 bandas populares de distintos puntos de Galicia, nun evento organizado pola Federación Galega de Bandas de Músicas Populares, que contou coa colaboración da Deputación a través dunha axuda de 7.000 euros. Por primeira vez, o encontro contou cunha agrupación internacional: a Banda Sinfónica Juvenil de Caldas (Colombia), que participou como convidada.
Ao longo de dúas xornadas, a música tradicional encheu a cidade, convertendo o certame nun espazo de visibilidade e intercambio cultural, no que se fomentou a calidade interpretativa e a difusión da cultura bandística galega.
“Construímos unha provincia máis inclusiva e máis xusta”
Durante a súa intervención, López apelou ao valor comunitario destas agrupacións. “Cando ensinades á mocidade a tocar un instrumento, cando organizades un concerto ou acompañades á veciñanza nunha festa, estades construíndo unha provincia máis inclusiva, máis integradora e máis xusta”, subliñou.
O presidente lembrou tamén a importancia das bandas nas festas e eventos populares: “Imaxinade o pasarrúas da nosa aldea en silencio… raro, verdade? Que sería das festas patronais sen un Bailaches Carolina ou das pezas que se tocan nos ascensos dos nosos equipos?”.
Con estas palabras, López quixo reivindicar o papel esencial da música popular na vida social e cultural galega, rematando cun desexo compartido: “Unha longa vida ás bandas de música populares, porque sodes parte da alma desta terra”.