Os usuarios poden reservar xa online e con antelación o seu billete para as lanzadeiras de volta dos concertos deste verán en Castrelos
O prezo do billete corresponde á tarifa ordinaria de transporte (1,57€). Os usuarios PassVigo poderán beneficiarse da tarifa bonificada no momento da compra online.
Este sistema de venda anticipada, que xa se ven utilizando nos últimos anos en diferentes citas musicais na cidade, estará dispoñible en todos os concertos programados en Castrelos.
A información para cada evento estará dispoñible en vitrasa.es e na plataforma de venda online Woutick.es
Vitrasa pon a disposición dos usuarios a venda online anticipada do billete do servizo especial de lanzadeiras para regresar dos concertos de Castrelos. O ano pasado puxéronse lanzadeiras para 7 concertos coas que se desprazaron máis de 3.400 persoas, das cales máis de 1.000 solicitaron o billete online de forma anticipada.
Co fin de que a cidadanía poida planificar a súa mobilidade con antelación ao recinto e garantir a súa praza no transporte público, o billete para o servizo de lanzadeiras dos concertos de Castrelos pode adquirirse de forma anticipada na web de venda online Woutick!. O prezo do billete é o correspondente á tarifa habitual de transporte público (1,57€). Aqueles usuarios que dispoñan de tarxeta PassVigo poderán introducir o seu número de tarxeta para beneficiarse da tarifa bonificada correspondente ó seu perfil no momento da compra.
As lanzadeiras estarán dispoñibles á finalización dos concertos e terán o seguinte percorrido:
Castrelos – Camelias – Venezuela – Urzáiz – García Barbón – Sanjurjo Badía – Travesía de Vigo – Pizarro – Praza de España – Gran Vía.
Para acceder ás lanzadeiras, os usuarios simplemente teñen que aportar o seu billete anticipado impreso ou no teléfono móbil. Vitrasa recorda aos usuarios que para acudir ó inicio do concerto, dispoñen da rede habitual de transporte público. As liñas que chegan ata as inmediacións do Auditorio de Castrelos son: 7, 12B, 17, A, H1 e H2