Participarán Inma López Silva, Francisco Castro, María Xosé Porteiro, Pedro Feijoo e Rexina Vega, e terá lugar ás 19.30 horas sendo a entrada de balde
Arranca a oferta cultural que a vicepresidenta primeira e delegada da área de Cultura da Deputación de Pontevedra, Marta Fernández-Tapias, ten deseñado para a sede viguesa en colaboración con colectivos culturais da provincia. A primeira das iniciativas, un coloquio centrado na novela negra e social enmarcado no ciclo “A Movida literaria”, terá lugar este xoves, 16 de novembro, ás 19.30 con entrada de balde e contará coa participación de escritores como Inma López Silva, Francisco Castro, María Xosé Porteiro, Pedro Feijoo e Rexina Vega.
O ciclo “A Movida literaria” abrangue dous coloquios sobre literatura viguesa que serven ademais para celebrar os cinco anos do medio cultural de referencia de Vigo: A Movida. Amais deste primeiro coloquio sobre novela negra, terá lugar outro, o mércores 29 de novembro, tamén ás 19:30 horas e con entrada de balde, centrado na literatura infantil e xuvenil en Galicia. Neste caso o coloquio estará protagonizado por escritores como Marcos Calveiro, Ledicia Costas, María Reimóndez e Manuel Esteban.
“O noso obxectivo –asegurou a vicepresidenta Marta Fernández-Tapias na presentación das propostas culturais da Deputación na súa sede de Vigo- é recuperar o papel da cidade como referente cultural”. Neste eido, Fernández-Tapias amosou o compromiso do Goberno provincial de exercer de catalizador dunha cidade que, “sendo berce da Movida dos anos 80, ten pendente recuperar a súa posición de liderado á fronte da vangarda cultural de España e facer valer a súa calidade artística e de dominio cultural”.
Ademais de “A Movida literaria”, a Deputación de Pontevedra ten previstas outras dúas iniciativas a desenvolver na sede de Vigo ata finais de ano: “Ultraluz”, unha experiencia artística que dá vida á obra de Ledicia Costas, e unha combinación de literatura, poesía e música da man de Culturgal. A primeira delas terá lugar na sede de Vigo da Deputación o 19 de decembro, ás 20:00 horas, e terá réplica en Pontevedra, o día 20 de decembro no Museo Provincial. Pola súa banda a proposta da man de Culturgal terá lugar na sede de Eduardo Chao os días 23 e 24 de novembro en tres sesións ás 6,7 e 8 da tarde, na que participarán catro Premios Xerais, así como figuras como Alba Garrido, Iria Morgade, Iolanda Zúñiga, Velpister, Catuxa, María Lado e Leilía que se encargará do peche deste Culturgal estendido con motivo da súa xira de despedida “Anque me vou non me vou”.